Tuesday, October 6, 2020

15.3 我想欲生一个囡仔

15.3 Góa siūⁿ boeh seⁿ chi̍t-ê gín-á
I chē tī liâu-á ni̍h, hiàn-chhut khoe-sé ê bīn-chhiuⁿ. M̄-koh, sīm-chì hit-sî, i mā ū chi̍t-ê hīⁿ-á teh thiaⁿ gōa-kháu chhiū-nâ ni̍h ê hong-hō͘ siaⁿ. Che hō͘ i kám-kak chiâⁿ ko͘-toaⁿ.
"M̄-koh, he kám bē kiat-sok?" yi kóng.
"Ái, ē lah. Sè-kài ē kiù ka-tī. Chòe-āu chi̍t-ê lâm-chú-hàn hông thâi-sí, só͘ ū ê lâng lóng kiu-kiu lun-lun ê sî: m̄-koán pe̍h, o͘, n̂g, kok sek ê lâng lóng kiu-kiu lun-lun ê sî: in tō lóng chhò-loān. In-ūi lí-tì ê té-tì chāi tī lān-hu̍t. In tō lóng chhò-loān, in tō chò in úi-tāi ê hóe-hêng (火刑, auto da fe). Lí chai, hóe-hêng tō sī sìn-ióng hêng-tōng? Ái, hó lah, in ē chò in ka-tī ê úi-tāi ê sió-sió ê sìn-ióng hêng-tōng. In tō hō͘-siong hiàn-chhut ka-tī."
"Lí sī kóng, hō͘-siong thâi-sí?"
"Sī, ah-bî-á! Lán nā chiàu taⁿ ê sok-tō͘, tī 100 nî ê sî-kan, chit-ê tó tō chhun bô chi̍t-bān lâng: hoān-sè bô 10 lâng. In tō lóng chhiong-móa ài hō͘-siong thâi-sí." Lûi-kong ê siaⁿ lú lâi lú hn̄g.
"Chiâⁿ chán!" yi kóng.
"Khak-si̍t chán! Siūⁿ tio̍h jîn-lūi ê bia̍t-choa̍t hām tī kî-thaⁿ bu̍t-chéng chhut-hiān chìn-chêng ê hit-tōaⁿ tn̂g-tn̂g ê tiām-chēng, lí ê sim-chêng tō pí siáⁿ lóng khah pêng-chēng. Lán nā kè-sio̍k kiâⁿ chit-tiâu lō͘, ta̍k-ê lóng án-ne, tì-sek hūn-chú, gē-su̍t-ka, chèng-hú, kang-gia̍p-ka hām kang-lâng lóng hong-kông thâi-sí jîn-lūi chòe-āu ê kám-chêng, in chòe-āu ê ti̍t-kak, chòe-āu ê kiān-choân pún-lêng; nā kè-sio̍k chhiūⁿ taⁿ án-ne í tāi-sò͘-sek ê chìn-tián: jîn-lūi tiāⁿ-tio̍h ē soah-hì! Chài-hōe lah! ài-jîn! Chôa thun-tiāu ka-tī, lâu-lo̍h chi̍t-ê khang, siong-tong ê hūn-loān, m̄-koh m̄-sī bô-bāng. Chiâⁿ hó! Kàu-sî iá-káu ē tī Wragby pūi, iá-bé ē tī Tevershall khòng-tiûⁿ kiâⁿ-ta̍h! Sîn ah, góa o-ló Lí (te deum laudamus)!
Connie chhiò chhut-lâi, m̄-koh m̄-sī chin hoaⁿ-hí.
"Nā án-ne, lí tio̍h hoaⁿ-hí, in lóng sī bolshevik chú-gī-chiá," yi kóng. "Lí tio̍h hoaⁿ-hí, in lóng kip-kip cháu hiòng boa̍t-ji̍t."
"Góa sī án-ne. Góa bô chó͘-tòng in. Tō kóng góa boeh, góa mā tòng in bē-tiâu."
"Nā án-ne, sī án-chóaⁿ lí pi-siong?"
"Góa bô! Nā sī góa ê ke-kang chòe-āu koh thî, góa mā bē chhap i."
"Nā sī kóng, lí ū chi̍t-ê gín-á neh?" yi kóng.
I thâu tìm lo̍h.
"Ái-ah," chòe-āu i kóng. "Chāi góa khòaⁿ, tī chit-ê sè-kài hō͘ gín-á chhut-sì, sī chhò-gō͘ koh pi-siong ê tāi-chì."
"Mài! Mài án-ne kóng! Mài án-ne kóng!" yi khún-kiû. "Góa teh siūⁿ boeh seⁿ chi̍t-ê. Kă kóng, lí chin hoaⁿ-hí." Yi kā chhiú tah tī i ê chhiú téng.
"Góa chin hoaⁿ-hí, in-ūi lí hoaⁿ-hí," i kóng. "M̄-koh, góa jīn-ûi, che tùi-put-khí hit-ê bōe chhut-sì ê gín-á."
"Ah, bē lah!" yi kek-tōng kóng. "Nā án-ne, lí m̄-sī chin-chiàⁿ ài góa! Lí nā kám-kak án-ne, tō bô ài góa!"
I koh tiām lo̍h-lâi, bīn kat-kat. Gōa-kháu kan-ta ū lo̍h-hō͘ siaⁿ.
"Che m̄-sī chin ê!" yi khin-siaⁿ kóng. "Che m̄-sī chin ê! Sū-si̍t m̄-sī án-ne." Yi kám-kak, i taⁿ pi-siong, chi̍t pō͘-hūn goân-in sī in-ūi yi boeh lī-khui i, kò͘-ì lī-khui khì Venice. Che hō͘ yi kám-kak sió-khóa hoaⁿ-hí.
Yi khiú-khui i ê saⁿ, hiàn-chhut i ê pak-tó͘, chim i ê tō͘-châi. Koh-lâi yi kā chhùi-phé ù-óa i ê pak-tó͘, siang-chhiú lám i he un-loán, tiām-chēng ê ē-io. In nn̄g-lâng ko͘-to̍k tī tōa-chúi tiong.
"Kă kóng, lí ài ū chi̍t-ê gín-á, hi-bāng ū!" yi ná nauh, ná kā bīn ù tī i ê pak-tó͘. "Kă kóng, lí boeh ài!"
"Ai-ah!" chòe-āu i kóng: yi kám-kak tio̍h i sin-thé ê kî-miāu chùn-tāng, hián-sī chhut ì-sek ê choán-piàn kap pàng-sang. "Ai-ah, góa ū-sî teh siūⁿ, nā ū lâng tī chia, tī thòaⁿ-kang tiong-kan chhì khòaⁿ-māi! In kang-chok chin chha, koh thàn bô chē. Nā ē-tàng kā in kóng: Mài siūⁿ siáⁿ chîⁿ ê tāi-chì. Iú-koan su-iàu, lán ê su-iàu bô chē. Lán mài ūi chîⁿ seng-oa̍h..."
--
15.3 我想欲生一个囡仔
伊坐 tī 寮仔 ni̍h, 現出詼洗 ê 面腔. M̄-koh, 甚至彼時, 伊 mā 有一个耳仔 teh 聽外口樹林 ni̍h ê 風雨聲. 這予伊感覺誠孤單.
"M̄-koh, 彼敢袂結束?" 她講.
"Ái, 會 lah. 世界會救家己. 最後一个男子漢 hông 刣死, 所有 ê 人攏勼勼 lun-lun ê 時: 毋管白, 烏, 黃, 各色 ê 人攏勼勼 lun-lun ê 時: in tō 攏錯亂. 因為理智 ê 底蒂在 tī 膦核. In tō 攏錯亂, in tō 做 in 偉大 ê hóe-hêng (火刑, auto da fe). 你知, 火刑 tō 是信仰行動? Ái, 好 lah, in 會做 in 家己 ê 偉大 ê 小小 ê 信仰行動. In tō 互相獻出家己."
"你是講, 互相刣死?"
"是, 鴨咪仔! 咱若照今 ê 速度, tī 100 年 ê 時間, 這个島 tō 賰無一萬人: 凡勢無 10 人. In tō 攏充滿愛互相刣死." 雷公 ê 聲 lú 來 lú 遠.
"誠讚!" 她講.
"確實讚! 想著人類 ê 滅絕和 tī 其他物種出現進前 ê 彼段長長 ê 恬靜, 你 ê 心情 tō 比啥攏較平靜. 咱若繼續行這條路, 逐个攏 án-ne, 智識份子, 藝術家, 政府, 工業家和工人攏慌狂刣死人類最後 ê 感情, in 最後 ê 直覺, 最後 ê 健全本能; 若繼續像今 án-ne 以代數式 ê 進展: 人類定著會煞戲! 再會 lah! 愛人! 蛇吞掉家己, 留落一个空, 相當 ê 混亂, m̄-koh 毋是無望. 誠好! 到時野狗會 tī Wragby 吠, 野馬會 tī Tevershall 礦場行踏! 神 ah, 我呵咾你 (te deum laudamus)!
Connie 笑出來, m̄-koh 毋是真歡喜.
"若 án-ne, 你著歡喜, in 攏是 bolshevik 主義者," 她講. "你著歡喜, in 攏急急走向末日."
"我是 án-ne. 我無阻擋 in. Tō 講我欲, 我 mā 擋 in 袂牢."
"若 án-ne, 是按怎你悲傷?"
"我無! 若是我 ê 雞公最後 koh 啼, 我 mā 袂 chhap 伊."
"若是講, 你有一个囡仔 neh?" 她講.
伊頭 tìm 落.
"Ái-ah," 最後伊講. "在我看, tī 這个世界予囡仔出世, 是錯誤 koh 悲傷 ê 代誌."
"莫! 莫 án-ne 講! 莫 án-ne 講!" 她懇求. "我 teh 想欲生一个. Kă 講, 你真歡喜." 她 kā 手搭 tī 伊 ê 手頂.
"我真歡喜, 因為你歡喜," 伊講. "M̄-koh, 我認為, 這對不起彼个未出世 ê 囡仔."
"Ah, 袂 lah!" 她激動講. "若 án-ne, 你毋是真正愛我! 你若感覺 án-ne, tō 無愛我!"
伊 koh 恬落來, 面結結. 外口干焦有落雨聲.
"這毋是真 ê!" 她輕聲講. "這毋是真 ê! 事實毋是 án-ne." 她感覺, 伊今悲傷, 一部份原因是因為她欲離開伊, 故意離開去 Venice. 這予她感覺小可歡喜.
她搝開伊 ê 衫, 現出伊 ê 腹肚, 唚伊 ê 肚臍. Koh 來她 kā 喙䫌 ù 倚伊 ê 腹肚, 雙手攬伊彼溫暖, 恬靜 ê 下腰. In 兩人孤獨 tī 大水中.
"Kă 講, 你愛有一个囡仔, 希望有!" 她 ná nauh, ná kā 面 ù tī 伊 ê 腹肚. "Kă 講, 你欲愛!"
"Ai-ah!" 最後伊講: 她感覺著伊身體 ê 奇妙顫動, 顯示出意識 ê 轉變 kap 放鬆. "Ai-ah, 我有時 teh 想, 若有人 tī 遮, tī 炭工中間試看覓! In 工作真差, koh 趁無濟. 若會當 kā in 講: 莫想啥錢 ê 代誌. 有關需要, 咱 ê 需要無濟. 咱莫為錢生活..."
--
15.3
He sat there in the hut, his face pulled to mocking irony. Yet even then, he had one ear set backwards, listening to the storm over the wood. It made him feel so alone.
‘But won’t it ever come to an end?’ she said.
‘Ay, it will. It’ll achieve its own salvation. When the last real man is killed, and they’re all tame: white, black, yellow, all colours of tame ones: then they’ll all be insane. Because the root of sanity is in the balls. Then they’ll all be insane, and they’ll make their grand auto da fe. You know auto da fe means act of faith? Ay, well, they’ll make their own grand little act of faith. They’ll offer one another up.’
‘You mean kill one another?’
‘I do, duckie! If we go on at our present rate then in a hundred years’ time there won’t be ten thousand people in this island: there may not be ten. They’ll have lovingly wiped each other out.’ The thunder was rolling further away.
‘How nice!’ she said.
‘Quite nice! To contemplate the extermination of the human species and the long pause that follows before some other species crops up, it calms you more than anything else. And if we go on in this way, with everybody, intellectuals, artists, government, industrialists and workers all frantically killing off the last human feeling, the last bit of their intuition, the last healthy instinct; if it goes on in algebraical progression, as it is going on: then ta-tah! to the human species! Goodbye! darling! the serpent swallows itself and leaves a void, considerably messed up, but not hopeless. Very nice! When savage wild dogs bark in Wragby, and savage wild pit-ponies stamp on Tevershall pit-bank! te deum laudamus!’
Connie laughed, but not very happily.
‘Then you ought to be pleased that they are all bolshevists,’ she said. ‘You ought to be pleased that they hurry on towards the end.’
‘So I am. I don’t stop ’em. Because I couldn’t if I would.’
‘Then why are you so bitter?’
‘I’m not! If my cock gives its last crow, I don’t mind.’
‘But if you have a child?’ she said.
He dropped his head.
‘Why,’ he said at last. ‘It seems to me a wrong and bitter thing to do, to bring a child into this world.’
‘No! Don’t say it! Don’t say it!’ she pleaded. ‘I think I’m going to have one. Say you’ll he pleased.’ She laid her hand on his.
‘I’m pleased for you to be pleased,’ he said. ‘But for me it seems a ghastly treachery to the unborn creature.’
‘Ah no!’ she said, shocked. ‘Then you can’t ever really want me! you can’t want me, if you feel that!’
Again he was silent, his face sullen. Outside there was only the threshing of the rain.
‘It’s not quite true!’ she whispered. ‘It’s not quite true! There’s another truth.’ She felt he was bitter now partly because she was leaving him, deliberately going away to Venice. And this half pleased her.
She pulled open his clothing and uncovered his belly, and kissed his navel. Then she laid her cheek on his belly and pressed her arm round his warm, silent loins. They were alone in the flood.
‘Tell me you want a child, in hope!’ she murmured, pressing her face against his belly. ‘Tell me you do!’
‘Why!’ he said at last: and she felt the curious quiver of changing consciousness and relaxation going through his body. ‘Why I’ve thought sometimes if one but tried, here among th’ colliers even! They’re workin’ bad now, an’ not earnin’ much. If a man could say to ’em: Dunna think o’ nowt but th’ money. When it comes ter wants, we want but little. Let’s not live for money — ’
--

Monday, October 5, 2020

15.2 In tī 寮仔, 外口落雷公雨

15.2 In tī liâu-á, gōa-kháu lo̍h lûi-kong-hō͘
Yi chē tio̍h, hām khàn-siú kóng khí yi boeh chhut-kok ê tāi-chì.
"Tán góa tńg-lâi ê sî," yi kóng, "góa ē kā Clifford kóng, góa tio̍h lī-khui i. Lí hām góa tō ē-tàng lī-khui. Bô-lâng ē chai, góa sī hām lí cháu. Lán ē-sái khì pa̍t-kok, hó bô? Khì Afrika a̍h Australia, lí khòaⁿ án-chóaⁿ?"
Chit-ê kè-ōe yi chin heng-hùn.
"Lí m̄-bat khì-kòe Si̍t-bīn-tē, sī bô?" i mn̄g yi.
"M̄-bat! Lí neh?"
"Góa bat khì India, hām Lâm Afrika, hām Egypt /e.gip/."
"Lán ná m̄ khì Lâm Afrika?"
"Lán ē-sái khì!" i bān-bān kóng.
"Sī m̄-sī lí bô siūⁿ boeh khì hia?" yi mn̄g.
"Góa bô chha. Góa chò siáⁿ lóng bô chha."
"Lí kám bô kám-kak hoaⁿ-hí? Ná ē bô hoaⁿ-hí? Lán bē bô-chîⁿ. Góa chi̍t-nî ū 600 Eng-pōng ê siu-ji̍p, góa ū siá-phe khì mn̄g. Sui-jiân bô chē, m̄-koh ū-kàu ah, Kám m̄-sī?"
"He chāi góa lâi-kóng, sǹg hó-gia̍h loh."
"Oh, án-ne tō ē ū-kàu chán!"
"M̄-koh góa tio̍h pān lī-hun, lí mā tio̍h pān, nā-bô, tāi-chì tō chin ho̍k-cha̍p."
Ū chin chē tāi-chì ài khó-lī.
Koh ū chi̍t-kang, yi mn̄g koan-hē i ê tāi-chì. In tī liâu-á ni̍h, gōa-kháu teh lo̍h lûi-kong-hō͘.
"Í-chêng lí sī tiong-ùi, sī kun-koaⁿ, mā-sī sin-sū, hit-sî lí ū khoài-lo̍k bô?"
"Khoài-lo̍k? Tio̍h. Góa kah-ì goán Siōng-hāu."
"Lí ū ài i bô?"
"Tio̍h! góa ài i."
"I ū ài lí bô?"
"Ū! Tī bó͘ chióng hong-bīn lâi kóng, i ài góa."
"Kā góa kóng i ê tāi-chì."
"Ū siáⁿ thang kóng ah? I chi̍t-pō͘ chi̍t-pō͘ seng-téng. I chin ài pō͘-tūi. I m̄-bat chhōa-bó͘. I ke góa 24 hòe. I sī chi̍t-ê chin chhong-bêng ê lâng: tī pō͘-tūi ni̍h, i ko͘-to̍k, i chit-chióng lâng tō-sī án-ne: i chin ū jia̍t-chêng, kap pa̍t-lâng bô kāng: sī chi̍t-ê chin khiáu ê kun-koaⁿ. Kap i chò-hóe ê sî, góa hō͘ i bê tio̍h. Ē-sái kóng, góa ê seng-oa̍h chhim-chhim siū i éng-hióng. M̄-koh góa éng-oán bē hoán-hóe."
"I sí-khì, lí sī m̄-sī chin kan-khó͘?"
"Góa ka-tī mā hiám-á sí. M̄-koh, tán góa ho̍k-goân, góa chai, góa ê chi̍t pō͘-hūn í-keng kiat-sok ah. M̄-koh, tī hit-chūn, góa it-ti̍t siūⁿ kóng, he tio̍h sí chiah ē kiat-sok. Só͘-ū ê mi̍h-kiāⁿ lóng sī án-ne."
Yi chē leh teh siūⁿ. Gōa-kháu lûi-kong teh hiáng. Ná-chhiūⁿ in sī tī Tōa-chúi sî-tāi ê chûn téng.
"Lí ê āu-piah ká-ná ū chin chē kò͘-sū," yi kóng.
"Sī oh? Góa kám-kak góa í-keng sí chi̍t-nn̄g kái ah. M̄-koh, taⁿ góa iáu tī chia thoa-miā, koh boeh tit-tio̍h koh-khah chē ê mâ-hoân."
Yi ná hó-hó siūⁿ, ná thiaⁿ hong-hō͘.
"Siōng-hāu sí-khì, lí chò kun-koaⁿ kap sin-sū, lí kám bô khoài-lo̍k?"
"Bô! In lóng kiâm-tok-tok." I hut-jiân chhiò chhut-lâi. "Siōng-hāu bat kóng: Koai-gín-á, Eng-kok ê tiong-sán kai-kip chi̍t-chhùi-pn̄g tio̍h pō͘ 30 ē, in-ūi in ê tn̂g-á lóng siuⁿ e̍h, chi̍t-lia̍p tāu-á tō ē kā that-tiâu. In sī chi̍t-tīn siōng-kài tàng-sng ê cha-bó͘ khoán ê chiáu-á: ài chū-ngó͘ khi-phiàn, liân ê-tòa kat m̄-tio̍h mā kiaⁿ-hiâⁿ, hú-pāi ná nōa-bah, chóng-sī siūⁿ-kóng ka-tī chiah tio̍h. Tō sī án-ne hō͘ góa khòaⁿ-phòa. In kha̍p-thâu, kha̍p-thâu, chīⁿ kha-chhng, chīⁿ kah chi̍h kiat-lan: m̄-koh chóng-sī jīn-ûi ka-tī chiah tio̍h. Ta̍k-hāng lóng ké-sian ké-tak. Ké-sian! Choân sī kan-ta ū pòaⁿ-lia̍p lān-hu̍t-á ê cha-bó͘ khoán ê ké-sian..."
Connie chhiò chhut-lâi. Hō͘ phā-phā kiò.
"I chheh in!"
"Bô!" i kóng. "I bô sim-chiâⁿ chheh in. I kan-ta thó-ià in. Che ū chha-pia̍t. In-ūi, i kóng, taⁿ liân kun-jîn mā lú lâi lú ke-sian, mā pòaⁿ-lia̍p lān-hu̍t, mā tn̂g-á e̍h. Seⁿ-chò án-ne sī jîn-lūi ê miā-ūn."
"Peh-sèⁿ, kang-lâng mā lóng án-ne?"
"Kui-sì-kè. In ê khì-phek lóng sí ah. Lóng khì hō͘ chū-tōng chhia, hō͘ tiān-iáⁿ-īⁿ, hō͘ hoe-lêng-ki khip-siu khì. Góa kā lí kóng, chi̍t-tāi put-jû chi̍t-tāi, tn̂g-á ná chhiū-leng-kóng, bīn hām siang-kha ná siah chò ê. Siah chò ê lâng! Che sī chi̍t-chióng ún-tēng ê bolshevik chú-gī tng-teh siau-biat jîn-sèng ê mi̍h-kiāⁿ, koh chông-pài ki-khì ê mi̍h-kiāⁿ. Chîⁿ, chîⁿ, chîⁿ! Só͘-ū hiān-tāi lâng chin-chiàⁿ hoat-hui ê sī thâi-tiāu lán-lâng kū ê jîn-sèng kám-chêng, kā kū ê Adam hām kū ê Eve tok chò bah-chiùⁿ. In lóng kāng-khoán. Sè-kài lóng kāng-khoán: thâi-tiāu jîn-sèng ê hiān-si̍t, lān-chiáu-phôe chi̍t-ê chi̍t Eng-pōng, lān-hu̍t-á nn̄g-lia̍p nn̄g Eng-pōng. Kóe sī siáⁿ, chí-put-kò sī sio-kàn ê ke-si! ... Sè-kài lóng kāng-khoán. Chhut chîⁿ kā sè-kài ê lān-chiáu tok-tiāu. Chhut chîⁿ, chîⁿ, chîⁿ hō͘ in, kā jîn-lūi ê khì-phek the̍h cháu, hō͘ in lóng piàn-sêng sió-sió kho̍k-kho̍k phîn ê ki-khì."
--
15.2 In tī 寮仔, 外口落雷公雨
她坐著, 和看守講起她欲出國 ê 代誌.
"等我轉來 ê 時," 她講, "我會 kā Clifford 講, 我著離開伊. 你和我 tō 會當離開. 無人會知, 我是和你走. 咱會使去別國, 好無? 去 Afrika 抑 Australia, 你看按怎?"
這个計畫她真興奮.
"你 m̄-bat 去過殖民地, 是無?" 伊問她.
"M̄-bat! 你 neh?"
"我 bat 去 India, 和南 Afrika, 和 Egypt /e.gip/."
"咱那毋去南 Afrika?"
"咱會使去!" 伊慢慢講.
"是毋是你無想欲去遐?" 她問.
"我無差. 我做啥攏無差."
"你敢無感覺歡喜? 那會無歡喜? 咱袂無錢. 我一年有 600 英鎊 ê 收入, 我有寫批去問. 雖然無濟, m̄-koh 有夠 ah, 敢毋是?"
"彼在我來講, 算好額 loh."
"Oh, án-ne tō 會有夠讚!"
"M̄-koh 我著辦離婚, 你 mā 著辦, 若無, 代誌 tō 真複雜."
有真濟代誌愛考慮.
Koh 有一工, 她問關係伊 ê 代誌. In tī 寮仔 ni̍h, 外口 teh 落雷公雨.
"以前你是中尉, 是軍官, mā 是紳士, 彼時你有快樂無?"
"快樂? 著. 我佮意阮上校."
"你有愛伊無?"
"著! 我愛伊."
"伊有愛你無?"
"有! Tī 某種方面來講, 伊愛我."
"Kā 我講伊 ê 代誌."
"有啥通講 ah? 伊一步一步升等. 伊真愛部隊. 伊 m̄-bat 娶某. 伊加我 24 歲. 伊是一个真聰明 ê 人: tī 部隊 ni̍h, 伊孤獨, 伊這種人 tō 是 án-ne: 伊真有熱情, kap 別人無仝: 是一个真巧 ê 軍官. Kap 伊做伙 ê 時, 我予伊迷著. 會使講, 我 ê 生活深深受伊影響. M̄-koh 我永遠袂反悔."
"伊死去, 你是 m̄ 是真艱苦?"
"我家己 mā 險仔死. M̄-koh, 等我復原, 我知, 我 ê 一部份已經結束 ah. M̄-koh, tī 彼陣, 我一直想講, 彼著死才會結束. 所有 ê 物件攏是 án-ne."
她坐 leh teh 想. 外口雷公 teh 響. Ná 像 in 是 tī 大水時代 ê 船頂.
"你 ê 後壁 ká-ná 有真濟故事," 她講.
"是 oh? 我感覺我已經死一兩改 ah. M̄-koh, 今我猶 tī 遮拖命, koh 欲得著 koh 較濟 ê 麻煩."
她 ná 好好想, ná 聽風雨.
"上校死去, 你做軍官 kap 紳士, 你敢無快樂?"
"無! In 攏鹹 tok-tok." 伊忽然笑出來. "上校 bat 講: 乖囡仔, 英國 ê 中產階級一喙飯著哺 30 下, 因為 in ê 腸仔攏 siuⁿ e̍h, 一粒豆仔 tō 會 kā 窒牢. In 是一陣上蓋凍酸 ê 查某款 ê 鳥仔: 愛自我欺騙, 連鞋帶結毋著 mā 驚惶, 腐敗 ná 爛肉, 總是想講家己才著. Tō 是 án-ne 予我看破. In 磕頭, 磕頭, 舐尻川, 舐 kah 舌結 lan: m̄-koh 總是認為家己才著. 逐項攏假仙假觸. 假仙! 全是干焦有半粒膦核仔 ê 查某款 ê 假仙..."
Connie 笑出來. 雨 phā-phā 叫.
"伊慼 in!"
"無!" 伊講. "伊無心情慼 in. 伊干焦討厭 in. 這有差別. 因為, 伊講, 今連軍人 mā lú 來 lú 假仙, mā 半粒膦核, mā 腸仔 e̍h. 生做 án-ne 是人類 ê 命運."
"百姓, 工人 mā 攏 án-ne?"
"規四界. In ê 氣魄攏死 ah. 攏去予自動車, 予電影院, 予飛行機吸收去. 我 kā 你講, 一代不如一代, 腸仔 ná 樹奶管, 面和雙跤 ná 錫做 ê. 錫做 ê 人! 這是一種穩定 ê bolshevik 主義 tng-teh 消滅人性 ê 物件, koh 崇拜機器 ê 物件. 錢, 錢, 錢! 所有現代人真正發揮 ê 是刣掉咱人舊 ê 人性感情, kā 舊 ê Adam 和舊 ê Eve 剁做肉醬. In 攏仝款. 世界攏仝款: 刣掉人性 ê 現實, 膦鳥皮一个一英鎊, 膦核仔兩粒兩英鎊. 粿是啥, 只不過是 sio-kàn ê 家私! ... 世界攏仝款. 出錢 kā 世界 ê 膦鳥剁掉. 出錢, 錢, 錢予 in, kā 人類 ê 氣魄提走, 予 in 攏變成小小 kho̍k-kho̍k phîn ê 機器."
--
15.2
She sat and talked to the keeper of her going abroad.
‘And then when I come back,’ she said, ‘I can tell Clifford I must leave him. And you and I can go away. They never need even know it is you. We can go to another country, shall we? To Africa or Australia. Shall we?’
She was quite thrilled by her plan.
‘You’ve never been to the Colonies, have you?’ he asked her.
‘No! Have you?’
‘I’ve been in India, and South Africa, and Egypt.’
‘Why shouldn’t we go to South Africa?’
‘We might!’ he said slowly.
‘Or don’t you want to?’ she asked.
‘I don’t care. I don’t much care what I do.’
‘Doesn’t it make you happy? Why not? We shan’t be poor. I have about six hundred a year, I wrote and asked. It’s not much, but it’s enough, isn’t it?’
‘It’s riches to me.’
‘Oh, how lovely it will be!’
‘But I ought to get divorced, and so ought you, unless we’re going to have complications.’
There was plenty to think about.
Another day she asked him about himself. They were in the hut, and there was a thunderstorm.
‘And weren’t you happy, when you were a lieutenant and an officer and a gentleman?’
‘Happy? All right. I liked my Colonel.’
‘Did you love him?’
‘Yes! I loved him.’
‘And did he love you?’
‘Yes! In a way, he loved me.’
‘Tell me about him.’
‘What is there to tell? He had risen from the ranks. He loved the army. And he had never married. He was twenty years older than me. He was a very intelligent man: and alone in the army, as such a man is: a passionate man in his way: and a very clever officer. I lived under his spell while I was with him. I sort of let him run my life. And I never regret it.’
‘And did you mind very much when he died?’
‘I was as near death myself. But when I came to, I knew another part of me was finished. But then I had always known it would finish in death. All things do, as far as that goes.’
She sat and ruminated. The thunder crashed outside. It was like being in a little ark in the Flood.
‘You seem to have such a lot behind you,’ she said.
‘Do I? It seems to me I’ve died once or twice already. Yet here I am, pegging on, and in for more trouble.’
She was thinking hard, yet listening to the storm.
‘And weren’t you happy as an officer and a gentleman, when your Colonel was dead?’
‘No! They were a mingy lot.’ He laughed suddenly. ‘The Colonel used to say: Lad, the English middle classes have to chew every mouthful thirty times because their guts are so narrow, a bit as big as a pea would give them a stoppage. They’re the mingiest set of ladylike snipe ever invented: full of conceit of themselves, frightened even if their boot-laces aren’t correct, rotten as high game, and always in the right. That’s what finishes me up. Kow-tow, kow-tow, arse-licking till their tongues are tough: yet they’re always in the right. Prigs on top of everything. Prigs! A generation of ladylike prigs with half a ball each — ’
Connie laughed. The rain was rushing down.
‘He hated them!’
‘No,’ said he. ‘He didn’t bother. He just disliked them. There’s a difference. Because, as he said, the Tommies are getting just as priggish and half-balled and narrow-gutted. It’s the fate of mankind, to go that way.’
‘The common people too, the working people?’
‘All the lot. Their spunk is gone dead. Motor-cars and cinemas and aeroplanes suck that last bit out of them. I tell you, every generation breeds a more rabbity generation, with india rubber tubing for guts and tin legs and tin faces. Tin people! It’s all a steady sort of bolshevism just killing off the human thing, and worshipping the mechanical thing. Money, money, money! All the modern lot get their real kick out of killing the old human feeling out of man, making mincemeat of the old Adam and the old Eve. They’re all alike. The world is all alike: kill off the human reality, a quid for every foreskin, two quid for each pair of balls. What is cunt but machine-fucking! — It’s all alike. Pay ’em money to cut off the world’s cock. Pay money, money, money to them that will take spunk out of mankind, and leave ’em all little twiddling machines.’
--

Sunday, October 4, 2020

15.1 六月十七她欲離開

Tē 15 Chiong
15.1 La̍k goe̍h cha̍p-chhit yi boeh lī-khui
Ū chi̍t-tiuⁿ Hilda kià ê phe khǹg tī chá-chhan ê phâng-pôaⁿ. "A-pa chit lé-pài khì London, góa ē tī 6 goe̍h 17, pài-4 hit-kang khì lín hia. Lí tio̍h chún-pī hó, lán chiah thang chek-sî chhut-hoat. Góa bô-ài tī Wragby lōng-hùi sî-kan, hia chiâⁿ khó-phà. Góa khó-lêng ē seng tī Retford khì Colemans in tau keh chi̍t mê, pài-4 ē khì lín tau chia̍h-tàu. Án-ne lán tī ē-po͘ chia̍h-tê ê sî-kan koh chhut-hoat, àm-sî tō tòa tī Grantham. Hām Clifford kòe àm bô siáⁿ lō͘-iōng. I nā thó-ià lí lī-khui, án-ne i tian-tò bô hoaⁿ-hí."
Tō-sī án-ne! Yi koh tī kî-pôaⁿ téng hō͘ lâng tu̍h leh lin-long se̍h.
Clifford chiok chheh yi lī-khui, in-ūi yi nā bô tī leh, i ē kám-kak bô an-choân. Yi nā tī sin-piⁿ, m̄-chai siáⁿ lí-iû, i tō kám-kak an-choân, tō ē-tàng chū-chāi chò i ài chò ê tāi-chì. I chhiâng-chāi khì thòaⁿ-khang, ká náu-kin boeh kái-koat hiah-ê bô-kái ê būn-tê, khòaⁿ án-chóaⁿ iōng siōng keng-chè ê hong-hoat chhái-thòaⁿ, koh kā bē chhut-khì. I chai, i tio̍h chhōe-chhut hong-hoat, khòaⁿ án-chóaⁿ sú-iōng che thô͘-thòaⁿ, a̍h-sī án-chóaⁿ kā choán-piàn, tō m̄-bián bē, a̍h-sī m̄-bián hoân-ló bô siau-lō͘. M̄-koh, i nā iōng he lâi hoat-tiān, boeh án-chóaⁿ bē tiān a̍h-sī iōng tiān? Nā-sī kā choán-piàn chò iû, sêng-pún iáu siuⁿ koân, ki-su̍t mā siuⁿ ho̍k-cha̍p. Ūi tio̍h ûi-chhî kang-gia̍p ê sèⁿ-miā, tio̍h koh chhòng-chō sin ê kang-gia̍p, ná khí-siáu leh.
Che sī chi̍t-chân khí-siáu ê tāi-chì, su-iàu siáu-lâng lâi oân-sêng. Sī ah, i sió-khóa siáu-siáu, Connie án-ne siūⁿ. Yi kám-kak, i tùi thòaⁿ-khang ê jia̍t-chêng kap châi-chêng lóng piáu-bêng i teh khí-siáu, i ê lêng-kám pún-sin tō sī khí-siáu ê lêng-kám.
I tiōng-iàu ê kè-ōe lóng kā yi kóng, yi iōng sim-sek ê sim-chêng thiaⁿ, chhāi i khì kóng. Āu-lâi, kóng-ōe siaⁿ thêng-chí, i khì khui rajíoh, piàn kah sit-sîn, sit-sîn, m̄-koh i ê kè-ōe hián-jiân iáu-sī ná chi̍t-chióng bîn-bāng, kè-sio̍k tîⁿ tī i ê sim ni̍h.
Chit-má ta̍k-àm i lóng hām Bolton Tt ī Eng-kok kun-jîn (Tommy) sńg ê pontoon pâi-á, su-iâⁿ 6 pence. Kāng-khoán, tī ī-pâi ê sî, i mā ē chìn-ji̍p bô-ì-sek ê chōng-thài, a̍h-sī ná sit-sîn teh chùi, a̍h-sī chùi kah sit-sîn, tō sī án-ne. Connie put-jím khòaⁿ i án-ne. M̄-koh yi nā khì khùn, i hām Bolton Tt tō kè-sio̍k poa̍h, it-ti̍t kàu pòaⁿ-mê 2 tiám a̍h 3 tiám, chū-chāi koh chhiong-moá hèng-chhù. Bolton Tt hèng chit-bī bē-su Clifford: sīm-chì koh-khah hèng, in-ūi yi chha-put-to lóng teh su.
Chi̍t-kang, yi kā Connie kóng: "Cha-àm góa su Clifford 23 shilling."
"I ū kā lí the̍h hit tiâu chîⁿ bô?" Connie tio̍h-kiaⁿ mn̄g yi.
"Tong-jiân lah, Hu-jîn! He sī sìn-iōng ê siàu!"
Connie tōa-tōa kā chek-pī, tùi in nn̄g-ê lóng chiâⁿ siū-khì. Kiat-kio̍k, Clifford Sià kā Bolton Tt ê nî-sin the̍h-koân 100 Eng-pōng, hō͘ yi thang iōng che poa̍h-kiáu. Tông-sî, chāi Connie khòaⁿ, Clifford chin-chiàⁿ bô io̍h kiù ah-lah.
Chòe-āu yi kā i kóng, 17 hit-ji̍t yi tit-boeh lī-khui ah.
"Cha̍p-chhit!" i kóng. "Iah lí tâng-sî ē tńg-lâi?"
"Siōng-bān kàu 7 goe̍h 20."
"Hó! 7 goe̍h 20."
I koài-kî koh sit-sîn khòaⁿ yi, ná gín-á ê bê-bâng, m̄-koh mā ná lāu-lâng kî-koài ê sit-sîn kan-chà.
"Lí bē hō͘ góa sit-bōng lah, sī bô?" i kóng.
"Án-chóaⁿ kóng?"
"Góa sī kóng, lí chhut-khì, lí tiāⁿ-tio̍h ē koh tńg-lâi?"
"He pí siáⁿ góa lóng khah khak-tēng, góa tiāⁿ-tio̍h ē tńg-lâi."
"Hó! Hmh! 7 goe̍h 20!"
I lia̍h yi khòaⁿ, kek kah chin koài.
Sū-si̍t i goān-ì yi khì. Che chin kî-miāu. I ài yi khì, tek-khak sī, hō͘ yi ū sió-sió ê lōng-bān, hoān-sè tńg-lâi ê sî tō ū-sin, án-ne chin hó. M̄-koh tông-sî, i iū-koh kiaⁿ yi chū án-ne cháu-khì.
Yi hèng chhih-chhih, kî-thāi chit-ê chin-chiàⁿ ê ki-hōe thang oân-choân lī-khui i, tán-thāi sî-kan khòaⁿ yi ka-tī kap i ka-tī ê sêng-se̍k.
--
第 15 章
15.1 六月十七她欲離開
有一張 Hilda 寄 ê 批囥 tī 早餐 ê 捀盤. "阿爸這禮拜去 London, 我會 tī 6 月 17, 拜 4 彼工去恁遐. 你著準備好, 咱才通即時出發. 我無愛 tī Wragby 浪費時間, 遐誠可怕. 我可能會先 tī Retford 去 Colemans in 兜隔一暝, 拜 4 會去恁兜食晝. Án-ne 咱 tī 下晡食茶 ê 時間 koh 出發, 暗時 tō 蹛 tī Grantham. 和 Clifford 過暗無啥路用. 伊若討厭你離開, án-ne 伊顛倒無歡喜."
Tō 是 án-ne! 她 koh tī 棋盤頂予人揬 leh lin-long 踅.
Clifford 足慼她離開, 因為她若無 tī leh, 伊會感覺無安全. 她若 tī 身邊, 毋知啥理由, 伊 tō 感覺安全, tō 會當自在做伊愛做 ê 代誌. 伊常在去炭空, 絞腦筋欲解決 hiah-ê 無解 ê 問題, 看按怎用上經濟 ê 方法採炭, koh kā 賣出去. 伊知, 伊著揣出方法, 看按怎使用這塗炭, 抑是按怎 kā 轉變, tō 毋免賣, 抑是毋免煩惱無銷路. M̄-koh, 伊若用彼來發電, 欲按怎賣電抑是用電? 若是 kā 轉變做油, 成本猶 siuⁿ 懸, 技術 mā siuⁿ 複雜. 為著維持工業 ê 性命, 著 koh 創造新 ê 工業, ná 起痟 leh.
這是一層起痟 ê 代誌, 需要痟人來完成. 是 ah, 伊小可痟痟, Connie án-ne 想. 她感覺, 伊對炭空 ê 熱情 kap 才情攏表明伊 teh 起痟, 伊 ê 靈感本身 tō 是起痟 ê 靈感.
伊重要 ê 計畫攏 kā 她講, 她用心適 ê 心情聽, 在伊去講. 後來, 講話聲停止, 伊去開 rajíoh, 變 kah 失神, 失神, m̄-koh 伊 ê 計畫顯然猶是 ná 一種眠夢, 繼續纏 tī 伊 ê 心 ni̍h.
Chit-má 逐暗伊攏和 Bolton Tt 奕英國軍人 (Tommy) 耍 ê pontoon 牌仔, 輸贏 6 pence. 仝款, tī 奕牌 ê 時, 伊 mā 會進入無意識 ê 狀態, 抑是 ná 失神 teh 醉, 抑是醉 kah 失神, tō 是 án-ne. Connie 不忍看伊 án-ne. M̄-koh 她若去睏, 伊和 Bolton Tt tō 繼續跋, 一直到半暝 2 點抑 3 點, 自在 koh 充滿興趣. Bolton Tt 興這味袂輸 Clifford: 甚至 koh 較興, 因為她差不多攏 teh 輸.
一工, 她 kā Connie 講: "昨暗我輸 Clifford 23 shilling."
"伊有 kā 你提彼條錢無?" Connie 著驚問她.
"當然 lah, 夫人! 彼是信用 ê 數!"
Connie 大大 kā 責備, 對 in 兩个攏誠受氣. 結局, Clifford Sià kā Bolton Tt ê 年薪提懸 100 英鎊, 予她通用這跋筊. 同時, 在 Connie 看, Clifford 真正無藥救 ah-lah.
最後她 kā 伊講, 17 彼日她得欲離開 ah.
"十七!" 伊講. "Iah 你 tang 時會轉來?"
"上慢到 7 月 20."
"好! 7 月 20."
伊怪奇 koh 失神看她, ná 囡仔 ê 迷茫, m̄-koh mā ná 老人奇怪 ê 失神奸詐.
"你袂予我失望 lah, 是無?" 伊講.
"按怎講?"
"我是講, 你出去, 你定著會 koh 轉來?"
"彼比啥我攏較確定, 我定著會轉來."
"好! Hmh! 7 月 20!"
伊掠她看, 激 kah 真怪.
事實伊願意她去. 這真奇妙. 伊愛她去, 的確是, 予她有小小 ê 浪漫, 凡勢轉來 ê 時 tō 有身, án-ne 真好. M̄-koh 同時, 伊又 koh 驚她自 án-ne 走去.
她興 chhih-chhih, 期待這个真正 ê 機會通完全離開伊, 等待時間看她家己 kap 伊家己 ê 成熟.
--
Chapter 15
15.1
There was a letter from Hilda on the breakfast-tray. ‘Father is going to London this week, and I shall call for you on Thursday week, June 17th. You must be ready so that we can go at once. I don’t want to waste time at Wragby, it’s an awful place. I shall probably stay the night at Retford with the Colemans, so I should be with you for lunch, Thursday. Then we could start at teatime, and sleep perhaps in Grantham. It is no use our spending an evening with Clifford. If he hates your going, it would be no pleasure to him.’
So! She was being pushed round on the chess-board again.
Clifford hated her going, but it was only because he didn’t feel safe in her absence. Her presence, for some reason, made him feel safe, and free to do the things he was occupied with. He was a great deal at the pits, and wrestling in spirit with the almost hopeless problems of getting out his coal in the most economical fashion and then selling it when he’d got it out. He knew he ought to find some way of using it, or converting it, so that he needn’t sell it, or needn’t have the chagrin of failing to sell it. But if he made electric power, could he sell that or use it? And to convert into oil was as yet too costly and too elaborate. To keep industry alive there must be more industry, like a madness.
It was a madness, and it required a madman to succeed in it. Well, he was a little mad. Connie thought so. His very intensity and acumen in the affairs of the pits seemed like a manifestation of madness to her, his very inspirations were the inspirations of insanity.
He talked to her of all his serious schemes, and she listened in a kind of wonder, and let him talk. Then the flow ceased, and he turned on the loudspeaker, and became a blank, while apparently his schemes coiled on inside him like a kind of dream.
And every night now he played pontoon, that game of the Tommies, with Mrs Bolton, gambling with sixpences. And again, in the gambling he was gone in a kind of unconsciousness, or blank intoxication, or intoxication of blankness, whatever it was. Connie could not bear to see him. But when she had gone to bed, he and Mrs Bolton would gamble on till two and three in the morning, safely, and with strange lust. Mrs Bolton was caught in the lust as much as Clifford: the more so, as she nearly always lost.
She told Connie one day: ‘I lost twenty-three shillings to Sir Clifford last night.’
‘And did he take the money from you?’ asked Connie aghast.
‘Why of course, my Lady! Debt of honour!’
Connie expostulated roundly, and was angry with both of them. The upshot was, Sir Clifford raised Mrs Bolton’s wages a hundred a year, and she could gamble on that. Meanwhile, it seemed to Connie, Clifford was really going deader.
She told him at length she was leaving on the seventeenth.
‘Seventeenth!’ he said. ‘And when will you be back?’
‘By the twentieth of July at the latest.’
‘Yes! the twentieth of July.’
Strangely and blankly he looked at her, with the vagueness of a child, but with the queer blank cunning of an old man.
‘You won’t let me down, now, will you?’ he said.
‘How?’
‘While you’re away, I mean, you’re sure to come back?’
‘I’m as sure as I can be of anything, that I shall come back.’
‘Yes! Well! Twentieth of July!’
He looked at her so strangely.
Yet he really wanted her to go. That was so curious. He wanted her to go, positively, to have her little adventures and perhaps come home pregnant, and all that. At the same time, he was afraid of her going.
She was quivering, watching her real opportunity for leaving him altogether, waiting till the time, herself himself should be ripe.
--