Saturday, October 10, 2020

15.7 等我轉來才來安排一切

15.7 Tán góa tńg-lâi chiah lâi an-pâi it-chhè
I tiām-tiām.
"M̄-koh Clifford Sià hi-bōng lí tò tńg-lâi, sī bô?
"Oh, góa tio̍h tò tńg-lâi," yi kóng: nn̄g-lâng koh tiām-tiām.
"Lí ē tī Wragby seⁿ chi̍t-ê gín-á, sī bô?" i mn̄g.
Yi ê chhiú siâm i ê ām-kún.
"Lí nā m̄ chhōa góa cháu, góa chí-hó án-ne." yi kóng.
"Chhōa lí cháu khì tó-ūi?"
"Tó-ūi lóng hó! lī-khui! Lī Wragby hn̄g-hn̄g ê ūi."
"Tang-sî"
"Ai-ah, góa tńg-lâi ê sî lah."
"M̄-koh, it-tàn lí lī-khui, tńg-lâi ū siáⁿ hó-chhù, kāng-khoán ê tāi-chì chò nn̄g-kái?" i kóng.
"Oh, góa tio̍h tńg-lâi. Góa í-keng tah-èng ah! Góa ū sêng-sim tah-èng kòe. Koh-kóng, góa tńg-lâi sī ūi-tio̍h lí, chin ê."
"Ūi-tio̍h lín ang ê la̍h-tiûⁿ khàn-siú?"
"Góa bô jīn-ûi che ū siáⁿ koan-hē," yi kóng.
"Bô?" i siūⁿ chi̍t-ē. "Nā án-ne, tang-sî lí chiah boeh koh lī-khui? Ū khak-tēng ê ji̍t-chí bô?"
"Oh, góa m̄-chai. Góa ē ùi Venice tńg-lâi. Kàu-sî lán chiah chún-pī it-chhè."
"Án-chóaⁿ chún-pī?"
"Oh, góa ē kā Clifford kóng. Góa tio̍h ài kā i kóng."
"Chin ê!"
I tiām-tiām. Yi siang-chhiú lám i ê ām-kún.
"Mài hō͘ góa ûi-lân," yi khún-kiû.
"Siáⁿ hō͘ lí ûi-lân?"
"Iú-koan góa khì Venice kap chò an-pâi ê tāi-chì."
I ê bīn siám kòe chi̍t-ê pòaⁿ khó͘-chhiò ê bî-chhiò.
"Góa bē ûi-lân lí," i kóng. "Góa kan-ta boeh chai lí ê bo̍k-tek. M̄-koh lí pēng bô chin-chiàⁿ chai-iáⁿ lí ka-tī. Lí chí-sī teh thoa sî-kan: seng lī-khui, chiah koh khòaⁿ-māi. Góa bô chek-pī lí. Góa siūⁿ lí chin khiáu. Lí khó-lêng kam-goān lâu tī Wragby chò hu-jîn. Góa bô chek-pī lí. Góa bô Wragby thang hō͘ lí. Sū-si̍t, lí mā chai-iáⁿ ùi góa chia lí thang tit-tio̍h siáⁿ. Bô, bô, góa siūⁿ lí bô m̄-tio̍h! Góa chin-chiàⁿ án-ne siūⁿ! Góa pēng bô siūⁿ boeh khò lí seng-oa̍h, hō͘ lí chhī. Che mā tio̍h khó-lū."
Yi m̄-chai án-chóaⁿ, kám-kak i ná sī teh kā pò-ho̍k.
"M̄-koh, lí boeh ài góa, sī bô?" yi mn̄g.
"Lí boeh ài góa bô?"
"Lí chai, góa ài. Che chin chheng-chhó."
"Tio̍h! Lí tang-sî boeh ài góa?"
"Lí chai, tán góa tńg-lâi lán ē-tàng an-pâi it-chhè. Taⁿ góa siáⁿ to kóng bē-lâi. Góa su-iàu léng-chēng koh chheng-chhéⁿ."
"Tio̍h! Tio̍h léng-chēng, chheng-chhéⁿ!"
Yi kám-kak hō͘ jiá-tio̍h.
"M̄-koh, lí siong-sìn góa, sī bô?" yi kóng.
"Oh, choat-tùi!"
Yi thiaⁿ-tio̍h i kháu-khì lāi-té ê khoe-sé.
"Nā án-ne, lí kă kóng," yi ti̍t-chiap kóng, "lí jīn-ûi, góa mài khì Venice khah hó sioh?"
"Góa khak-tēng, lí tio̍h khì Venice khah hó," i iōng léng-tām, sió-khóa khoe-sé ê kháu-khì kā ìn.
"Lí chai, he sī āu lé-pài sì?" yi kóng.
"Góa chai!"
Taⁿ yi khai-sí siūⁿ. Chòe-āu yi kóng:
"Tán góa tńg-lâi, lán tō ē chai-iáⁿ, lán tàu-té sī án-chóaⁿ, sī bô?"
"Oh, tong-jiân!"
Nn̄g-lâng tiong-kan ū koài-kî ê chhim-kau!
"Góa ū khì chhōe lu̍t-su boeh pān góa ê lī-hun," i kóng, sió-khóa bián-kióng.
Yi sió-khóa chùn chi̍t-ē.
"Sī oh!" yi kóng. "Lu̍t-su án-chóaⁿ kóng?"
"I kóng, góa chá tio̍h ài pān ah; taⁿ ē khah khùn-lân. M̄-koh, in-ūi hit-sî góa tī pō͘-tūi, i jīn-ûi boeh pān mā bô būn-tê. Chí kiaⁿ, chi̍t khai-sí pān, yi soah cháu tńg-lâi!"
"Kám tio̍h hō͘ yi chai?"
"Tio̍h! Yi ē chiap tio̍h chi̍t tiuⁿ thong-ti: kap yi tông-ki hit-lâng mā ē chiap tio̍h, i sī kiōng-tông pī-kò."
"Chiâⁿ thó-ià, kok-chióng chhiú-sio̍k! Góa siūⁿ, góa kap Clifford mā tio̍h kiâⁿ chit-tiâu lō͘."
--
15.7 等我轉來才來安排一切
伊恬恬.
"M̄-koh Clifford Sià 希望你倒轉來, 是無?
"Oh, 我著倒轉來," 她講: 兩人 koh 恬恬.
"你會 tī Wragby 生一个囡仔, 是無?" 伊問.
她 ê 手尋伊 ê 頷頸.
"你若毋 chhōa 我走, 我只好 án-ne." 她講.
"Chhōa 你走去佗位?"
"佗位攏好! 離開! 離 Wragby 遠遠 ê 位."
"Tang 時"
"Ai-ah, 我轉來 ê 時 lah."
"M̄-koh, 一旦你離開, 轉來有啥好處, 仝款 ê 代誌做兩改?" 伊講.
"Oh, 我著轉來. 我已經答應 ah! 我有誠心答應過. Koh 講, 我轉來是為著你, 真 ê."
"為著恁翁 ê 獵場看守?"
"我無認為這有啥關係," 她講.
"無?" 伊想一下. "若 án-ne, tang 時你才欲 koh 離開? 有確定 ê 日子無?"
"Oh, 我毋知. 我會 ùi Venice 轉來. 到時咱才準備一切."
"按怎準備?"
"Oh, 我會 kā Clifford 講. 我著愛 kā 伊講."
"真 ê!"
伊恬恬. 她雙手攬伊 ê 頷頸.
"莫予我為難," 她懇求.
"啥予你為難?"
"有關我去 Venice kap 做安排 ê 代誌."
伊 ê 面閃過一个半苦笑 ê 微笑.
"我袂為難你," 伊講. "我干焦欲知你 ê 目的. M̄-koh 你並無真正知影你家己. 你只是 teh 拖時間: 先離開, 才 koh 看覓. 我無責備你. 我想你真巧. 你可能甘願留 tī Wragby 做夫人. 我無責備你. 我無 Wragby 通予你. 事實, 你 mā 知影 ùi 我遮你通得著啥. 無, 無, 我想你無毋著! 我真正 án-ne 想! 我並無想欲靠你生活, 予你飼. 這 mā 著考慮."
她毋知按怎, 感覺伊 ná 是 teh kā 報復.
"M̄-koh, 你欲愛我, 是無?" 她問.
"你欲愛我無?"
"你知, 我愛. 這真清楚."
"著! 你 tang 時欲愛我?"
"你知, 等我轉來咱會當安排一切. 今我啥都講袂來. 我需要冷靜 koh 清醒."
"著! 著冷靜, 清醒!"
她感覺予惹著.
"M̄-koh, 你相信我, 是無?" 她講.
"Oh, 絕對!"
她聽著伊口氣內底 ê 詼洗.
"若 án-ne, 你 kă 講," 她直接講, "你認為, 我莫去 Venice 較好 sioh?"
"我確定, 你著去 Venice 較好," 伊用冷淡, 小可詼洗 ê 口氣 kā 應.
"你知, 彼是後禮拜四?" 她講.
"我知!"
今她開始想. 最後她講:
"等我轉來, 咱 tō 會知影, 咱到底是按怎, 是無?"
"Oh, 當然!"
兩人中間有怪奇 ê 深溝!
"我有去揣律師欲辦我 ê 離婚," 伊講, 小可勉強.
她小可顫一下.
"是 oh!" 她講. "律師按怎講?"
"伊講, 我早著愛辦 ah; 今會較困難. M̄-koh, 因為彼時我 tī 部隊, 伊認為欲辦 mā 無問題. 只驚, 一開始辦, 她煞走轉來!"
"敢著予她知?"
"著! 她會接著一張通知: kap 她同居彼人 mā 會接著, 伊是共同被告."
"誠討厭, 各種手續! 我想, 我 kap Clifford mā 著行這條路."
--
15.7
He was silent.
‘But Sir Clifford expects you to come back to him?’
‘Oh, I must come back,’ she said: and there was silence.
‘And would you have a child in Wragby?’ he asked.
She closed her arm round his neck.
‘If you wouldn’t take me away, I should have to,’ she said.
‘Take you where to?’
‘Anywhere! away! But right away from Wragby.’
‘When?’
‘Why, when I come back.’
‘But what’s the good of coming back, doing the thing twice, if you’re once gone?’ he said.
‘Oh, I must come back. I’ve promised! I’ve promised so faithfully. Besides, I come back to you, really.’
‘To your husband’s game-keeper?’
‘I don’t see that that matters,’ she said.
‘No?’ He mused a while. ‘And when would you think of going away again, then; finally? When exactly?’
‘Oh, I don’t know. I’d come back from Venice. And then we’d prepare everything.’
‘How prepare?’
‘Oh, I’d tell Clifford. I’d have to tell him.’
‘Would you!’
He remained silent. She put her arms round his neck.
‘Don’t make it difficult for me,’ she pleaded.
‘Make what difficult?’
‘For me to go to Venice and arrange things.’
A little smile, half a grin, flickered on his face.
‘I don’t make it difficult,’ he said. ‘I only want to find out just what you are after. But you don’t really know yourself. You want to take time: get away and look at it. I don’t blame you. I think you’re wise. You may prefer to stay mistress of Wragby. I don’t blame you. I’ve no Wragbys to offer. In fact, you know what you’ll get out of me. No, no, I think you’re right! I really do! And I’m not keen on coming to live on you, being kept by you. There’s that too.’
She felt somehow as if he were giving her tit for tat.
‘But you want me, don’t you?’ she asked.
‘Do you want me?’
‘You know I do. That’s evident.’
‘Quite! And when do you want me?’
‘You know we can arrange it all when I come back. Now I’m out of breath with you. I must get calm and clear.’
‘Quite! Get calm and clear!’
She was a little offended.
‘But you trust me, don’t you?’ she said.
‘Oh, absolutely!’
She heard the mockery in his tone.
‘Tell me then,’ she said flatly; ‘do you think it would be better if I don’t go to Venice?’
‘I’m sure it’s better if you do go to Venice,’ he replied in the cool, slightly mocking voice.
‘You know it’s next Thursday?’ she said.
‘Yes!’
She now began to muse. At last she said:
‘And we shall know better where we are when I come back, shan’t we?’
‘Oh surely!’
The curious gulf of silence between them!
‘I’ve been to the lawyer about my divorce,’ he said, a little constrainedly.
She gave a slight shudder.
‘Have you!’ she said. ‘And what did he say?’
‘He said I ought to have done it before; that may be a difficulty. But since I was in the army, he thinks it will go through all right. If only it doesn’t bring her down on my head!’
‘Will she have to know?’
‘Yes! she is served with a notice: so is the man she lives with, the co-respondent.’
‘Isn’t it hateful, all the performances! I suppose I’d have to go through it with Clifford.’
--

Friday, October 9, 2020

15.6 這是 sè-kài-it ê 查某尻川

15.6 Che sī sè-kài-it ê cha-bó͘ kha-chhng
I iōng chhiú phok yi ê kha-chhng-phé, bān-bān, bî-miāu thàm ji̍p oan-oan, pá-tīⁿ ê āu-táu tiong-kan.
"Lír ê bér-liu ū-kàu chán," i iōng he tīⁿ-âu ê khiuⁿ-kháu kóng. "Che kha-chhng bô lâng ū. Che sī sè-kài it, sè-kài chán ê cha-bó͘ kha-chhng! I ê múi pō͘-hūn lóng sī cha-bó͘, ū cha-bó͘ lâng khoán. Lír m̄-sī hit-khoán ū kha-chhng ná liú-á khang ê cha-bó͘, he sio̍k tī cha-po͘ gín-á! Lír ū chi̍t-ê chin-chiàⁿ jiû-nńg, sûi-sûi ê āu-táu, che sī cha-po͘ lâng chin sim só͘ ài ê. Chit-lō kha-chhng-táu ē-tàng tòng-tiâu choân sè-kài, chin ê!"
I ná kóng ná khin-jiû phok hit-ê pá-móa ê āu-táu, it-ti̍t kàu ná ū chi̍t-chióng ku̍t-liu ê hóe ùi hia lâi-kàu i ê chhiú. I ê chéng-tháu-á bak tio̍h yi sin-khu hit nn̄g-ê pì-bi̍t ê khang-kháu, chi̍t-kái koh chi̍t-kái, iōng chi̍t-chióng jiû-jiû ná hóe teh so ê tōng-chok.
"Lír nā pàng sái a̍h pàng giō, góa ē hoaⁿ-hí. Góa bô ài bē pàng sái-giō ê cha-bó͘."
Connie tòng bē-tiâu, soah chhiò kah ki-ki kiò, m̄-koh i put-chhap, kè-sio̍k kóng.
"Lír sī chin ê! Lír sī chin ê, Lír ū sió-khóa hiâu kha-chhng. Chia lír pàng-sái, chia lír pàng giō: óa kā chhiú khǹg chit nō-ūi, nō-ê óa lóng ài. Nō-ê óa lóng ài. Lír ū chi̍t-ê sek-tòng ê cha-bó͘ kha-chhng, chin hi-hán. Che bô siáⁿ thang kiàn-siàu, che bē."
I kā chhiú ân-ân ù óa yi su-bi̍t ê só͘-chāi, ná-chhiūⁿ teh chò chhin-bi̍t ê chio-ho͘.
"Óa kah-ì che," i kóng. "Óa kah-ì che! Óa nā kan-ta thang oa̍h 10 hun-cheng, ē-tàng phok lír ê kha-chhng, kap i sio-bat, óa tiāⁿ-tio̍h boán-chiok chit sì-lâng, lír chai! Chhap i kang-gia̍p hē-thóng a̍h siáⁿ! Che sī óa ê hó ji̍t-chí."
Yi oa̍t-sin, peh chiūⁿ i ê kha-thúi téng, óa i. "Chim góa!" yi khin-siaⁿ kóng.
Yi chai, nn̄g-lâng ê sim ni̍h lóng ū lī-pia̍t ê sim-chêng, āu-lâi yi kám-kak siong-sim.
Yi chē tī i ê tōa-thúi téng, thâu khòe tī i ê heng-chêng, yi he ná chhiūⁿ-gê ê siang-thúi peh khui, hóe-kng thiàu-tāng chiò tio̍h in. Thâu lê-lê chē leh, i chioh tio̍h hóe-kng khòaⁿ yi sin-thé ê kap-phāng, khòaⁿ yi tōa-thúi tiong-kan chhàng-chhàng ê chang-sek ê mo͘. I chhun chhiú khì āu-piah ê toh-téng, the̍h yi chah tńg-lâi ê hoe-sok, taⁿ iáu-koh tâm lok-lok, kúi tih hō͘-chúi tih lo̍h yi sin-khu.
"Hoe chóng-sī put-sî tī gōa-kháu," i kóng. "In bô chhù."
"Liân liâu-á mā bô!" yi nauh.
Iōng chēng-chēng ê chéng-thâu-á, i kat kúi lúi bo̍k-bōng hoe tī Ài-sîn soaⁿ (mound of Venus) téng ê iù-iù chang-sek ê mo͘-khiû.
"Khòaⁿ!" i kóng. "Bo̍k-bōng hoe tī chèng-khak ê só͘-chāi!"
Yi khòaⁿ lo̍h he tī yi sin-khu ē, chang-sek mo͘-khiû ni̍h gû-leng sek ê sió hoe-lúi.
"Chiâⁿ hó-khòaⁿ!" yi kóng.
"Hó-khòaⁿ kah ná sèⁿ-miā," i ìn.
I koh chhah chi̍t-ki hún-âng chián-chhiu-lô hoe-m̂ tī mo͘-khiû ni̍h.
"Khòaⁿ! He sī góa, bián tit lí bē-kì-tit góa! He sī chúi-chek (水燭, bull-rushes) tiong-kan ê Moses /mo.se/."
"Góa boeh lī-khui, lí bē hoán-tùi lah hoⁿh?" yi put-an kā mn̄g, ná khòaⁿ i ê bīn.
M̄-koh i tîm-tāng ba̍k-bâi ē ê bīn bô hó lí-kái. I kek kah bâng-bâng, bô piáu-chêng.
"Lí chiàu lí ê ì-sù khì chò," i kóng.
Taⁿ i kóng piau-chún ê Eng-gí.
"Lí nā bô goān-ì, góa tō bô boeh khì," yi kóng, ná óa tiâu i.
Siang-lâng tiām-tiām. I àⁿ-sin, khǹg chi̍t-kho͘ chhâ ji̍p hóe. Hóe iām chiò tī i he chēng-chēng, bô piáu-chêng ê bīn. Yi tán leh, m̄-koh i siáⁿ to bô kóng.
"Chí-sī, góa siūⁿ-kóng, che sī khai-sí kap Clifford hun-khui ê hó hong-hoat. Góa ài ū gín-á. Che hō͘ góa ū ki-hōe, thang..." yi boeh koh kóng.
"Thang hō͘ in siong-sìn hau-siâu ōe," i kóng.
"Tio̍h, che sī kî-tiong chi̍t-hāng. Lí kám ài in chai-iáⁿ sū-si̍t?"
"Góa bô koan-sim in án-chóaⁿ siūⁿ."
"Góa ū! Góa bô-ài in iōng léng-tām ê sim lâi tùi-thāi góa, iû-kî góa iáu tī Wragby ê sî. Góa lī-khui liáu, in boeh án-chóaⁿ siūⁿ lóng ē-sái."
--
15.6 這是 sè-kài-it ê 查某尻川
伊用手撲她 ê 尻川䫌, 慢慢, 微妙探入彎彎, 飽滇 ê 後斗中間.
"Lír ê bér 溜有夠讚," 伊用彼滇喉 ê 腔口講. "這尻川無人有. 這是 sè-kài-it, 世界讚 ê 查某尻川! 伊 ê 每部份攏是查某, 有查某人款. Lír 毋是彼款有尻川 ná 鈕仔空 ê 查某, 彼屬 tī 查埔囡仔! Lír 有一个真正柔軟, 垂垂 ê 後斗, 這是查埔人真心所愛 ê. 這號尻川斗會當擋牢全世界, 真 ê!"
伊 ná 講 ná 輕柔撲彼个飽滿 ê 後斗, 一直到 ná 有一種滑溜 ê 火 ùi 遐來到伊 ê 手. 伊 ê 指頭仔沐著她身軀彼兩个祕密 ê 空口, 一改 koh 一改, 用一種柔柔 ná 火 teh 挲 ê 動作.
"Lír 若放屎抑放 giō, 我會歡喜. 我無愛袂放屎 giō ê 查某."
Connie 擋袂牢, 煞笑 kah ki-ki 叫, m̄-koh 伊不 chhap, 繼續講.
"Lír 是真 ê! Lír 是真 ê, Lír 有小可嬈尻川. 遮 lír 放屎, 遮 lír 放 giō: óa kā 手囥這 nō 位, nō 个 óa 攏愛. Nō 个 óa 攏愛. Lír 有一个適當 ê 查某尻川, 真稀罕. 這無啥通見笑, 這袂."
伊 kā 手絚絚 ù 倚她私密 ê 所在, ná 像 teh 做親密 ê 招呼.
"Óa 佮意這," 伊講. "Óa 佮意這! Óa 若干焦通活 10 分鐘, 會當撲 lír ê 尻川, kap 伊相 bat, óa 定著滿足這世人, lír 知! Chhap 伊工業系統抑啥! 這是 óa ê 好日子."
她越身, peh 上伊 ê 跤腿頂, 倚伊. "唚我!" 她輕聲講.
她知, 兩人 ê 心 ni̍h 攏有離別 ê 心情, 後來她感覺傷心.
她坐 tī 伊 ê 大腿頂, 頭 khòe tī 伊 ê 胸前, 她彼 ná 象牙 ê 雙腿擘開, 火光跳動照著 in. 頭 lê-lê 坐 leh, 伊借著火光看她身體 ê 敆縫, 看她大腿中間聳聳 ê 棕色 ê 毛. 伊伸手去後壁 ê 桌頂, 提她扎轉來 ê 花束, 今猶 koh 澹 lok-lok, 幾滴雨水滴落她身軀.
"花總是不時 tī 外口," 伊講. "In 無厝."
"連寮仔 mā 無!" 她 nauh.
用靜靜 ê 指頭仔, 伊結幾蕊莫忘花 tī 愛神山 (mound of Venus) 頂 ê 幼幼棕色 ê 毛虯.
"看!" 伊講. "莫忘花 tī 正確 ê 所在!"
她看落彼 tī 她身軀下, 棕色毛虯 ni̍h 牛奶色 ê 小花蕊.
"誠好看!" 她講.
"好看 kah ná 性命," 伊應.
伊 koh 插一支粉紅剪秋羅花莓 tī 毛虯 ni̍h.
"看! 彼是我, 免得你袂記得我! 彼是 chúi-chek (水燭, bull-rushes) 中間 ê Moses /mo.se/."
"我欲離開, 你袂反對 lah hoⁿh?" 她不安 kā 問, ná 看伊 ê 面.
M̄-koh 伊沉重目眉下 ê 面無好理解. 伊激 kah 茫茫, 無表情.
"你照你 ê 意思去做," 伊講.
今伊講標準 ê 英語.
"你若無願意, 我 tō 無欲去," 她講, ná 倚牢伊.
雙人恬恬. 伊 àⁿ 身, 囥一箍柴入火. 火焰照 tī 伊彼靜靜, 無表情 ê 面. 她等 leh, m̄-koh 伊啥都無講.
"只是, 我想講, 這是開始 kap Clifford 分開 ê 好方法. 我愛有囡仔. 這予我有機會, 通..." 她欲 koh 講.
"通予 in 相信 hau-siâu 話," 伊講.
"著, 這是其中一項. 你敢愛 in 知影事實?"
"我無關心 in 按怎想."
"我有! 我無愛 in 用冷淡 ê 心來對待我, 尤其我猶 tī Wragby ê 時. 我離開了, in 欲按怎想攏會使."
--
15.6
He stroked her tail with his hand, long and subtly taking in the curves and the globe-fullness.
‘Tha’s got such a nice tail on thee,’ he said, in the throaty caressive dialect. ‘Tha’s got the nicest arse of anybody. It’s the nicest, nicest woman’s arse as is! An’ ivery bit of it is woman, woman sure as nuts. Tha’rt not one o’ them button-arsed lasses as should be lads, are ter! Tha’s got a real soft sloping bottom on thee, as a man loves in ’is guts. It’s a bottom as could hold the world up, it is!’
All the while he spoke he exquisitely stroked the rounded tail, till it seemed as if a slippery sort of fire came from it into his hands. And his finger-tips touched the two secret openings to her body, time after time, with a soft little brush of fire.
‘An’ if tha shits an’ if tha pisses, I’m glad. I don’t want a woman as couldna shit nor piss.’
Connie could not help a sudden snort of astonished laughter, but he went on unmoved.
‘Tha’rt real, tha art! Tha’art real, even a bit of a bitch. Here tha shits an’ here tha pisses: an’ I lay my hand on ’em both an’ like thee for it. I like thee for it. Tha’s got a proper, woman’s arse, proud of itself. It’s none ashamed of itself this isna.’
He laid his hand close and firm over her secret places, in a kind of close greeting.
‘I like it,’ he said. ‘I like it! An’ if I only lived ten minutes, an’ stroked thy arse an’ got to know it, I should reckon I’d lived onelife, see ter! Industrial system or not! Here’s one o’ my lifetimes.’
She turned round and climbed into his lap, clinging to him. ‘Kiss me!’ she whispered.
And she knew the thought of their separation was latent in both their minds, and at last she was sad.
She sat on his thighs, her head against his breast, and her ivory-gleaming legs loosely apart, the fire glowing unequally upon them. Sitting with his head dropped, he looked at the folds of her body in the fire-glow, and at the fleece of soft brown hair that hung down to a point between her open thighs. He reached to the table behind, and took up her bunch of flowers, still so wet that drops of rain fell on to her.
‘Flowers stops out of doors all weathers,’ he said. ‘They have no houses.’
‘Not even a hut!’ she murmured.
With quiet fingers he threaded a few forget-me-not flowers in the fine brown fleece of the mound of Venus.
‘There!’ he said. ‘There’s forget-me-nots in the right place!’
She looked down at the milky odd little flowers among the brown maiden-hair at the lower tip of her body.
‘Doesn’t it look pretty!’ she said.
‘Pretty as life,’ he replied.
And he stuck a pink campion-bud among the hair.
‘There! That’s me where you won’t forget me! That’s Moses in the bull-rushes.’
‘You don’t mind, do you, that I’m going away?’ she asked wistfully, looking up into his face.
But his face was inscrutable, under the heavy brows. He kept it quite blank.
‘You do as you wish,’ he said.
And he spoke in good English.
‘But I won’t go if you don’t wish it,’ she said, clinging to him.
There was silence. He leaned and put another piece of wood on the fire. The flame glowed on his silent, abstracted face. She waited, but he said nothing.
‘Only I thought it would be a good way to begin a break with Clifford. I do want a child. And it would give me a chance to, to — ’ she resumed.
‘To let them think a few lies,’ he said.
‘Yes, that among other things. Do you want them to think the truth?’
‘I don’t care what they think.’
‘I do! I don’t want them handling me with their unpleasant cold minds, not while I’m still at Wragby. They can think what they like when I’m finally gone.’
--

Thursday, October 8, 2020

15.5 她褪光光, tī 雨 ni̍h 跳舞

15.5 Yi thǹg kng-kng, tī hō͘ ni̍h thiàu-bú
Gōa-kháu ê lûi-siaⁿ í-keng thêng, m̄-koh pún-chiâⁿ piàn sè ê hō͘, hiông-hiông koh lo̍h tōa, tòe tio̍h chòe-āu ê sih-nah kap hong-hō͘ ê siaⁿ-im. Connie sim-sîn bē tiāⁿ. I í-keng kóng chiah kú, sū-si̍t-siōng sī kóng hō͘ ka-tī thiaⁿ, m̄-sī hō͘ Connie. I ná-chhiūⁿ oân-choân kám-kak choa̍t-bōng, m̄-koh yi hoaⁿ-hí, yi thó-ià choa̍t-bōng. Yi chai, sī in-ūi yi boeh lī-khui i, i chiah ē tūi-lo̍h chit-chióng sim-chêng. Che hō͘ yi kám-kak chin tek-ì.
Yi khui mn̂g, khòaⁿ gōa-kháu ti̍t-ti̍t ê tōa-hō͘, ná-chhiūⁿ chi̍t-phìⁿ thih-bō͘, hut-jiân soah siūⁿ boeh cháu-ji̍p hō͘ tiong, cháu lī-khui. Yi khiā khí-lâi, kā tn̂g boe̍h-á kín thǹg-tiāu, koh thǹg gōa-saⁿ kap lāi-té saⁿ, i khòaⁿ kah bô chhoán-khùi. Yi ná tín-tāng, hit nn̄g-lia̍p chiam-chiam ê leng tòe teh iô koh chùn. Tī chheⁿ-sek kng-sòaⁿ ni̍h, yi pe̍h kah ná chhiūⁿ-gê. Yi koh lom hó yi ê chhiū-leng-ê, hoat-chhut chi̍t-chūn gōng-chhiò tō chông chhut-khì, ná thèⁿ yi ê leng khì lâm-hō͘, koh siang-chhiú tián-khui, tī hō͘ ni̍h bông-bông cháu-thiàu chá-chêng tī Dresden só͘ o̍h ê ūn-lu̍t bú-pō͘. He sī chi̍t-ê kî-koài ê bông-bông lâng-iaⁿ giâ-koân koh pàng-kē, koh oan-lo̍h, hō͘ kā ak, koh tī yi pá-móa ê kha-chhng-táu hoat-kng, yi koh hàiⁿ khí-lâi, tī hō͘ ni̍h kā pak-tó͘ thèⁿ chêng, yi koh oan lo̍h-khì, kan-ta kui-ê ē-io kap kha-chhng-phé ná chhiūⁿ hiàn-lé án-ne sàng kàu i ê bīn-chêng, chi̍t-pái koh chi̍t-pái, ná-chhiūⁿ teh pài-sîn.
I gōng chhiò, kā saⁿ-á mā thǹg-tiāu. He hō͘ i tòng bē-tiâu. I thiàu chhut-khì, chhiah-khò͘-lān, pe̍h phau-phau, sió chùn chi̍t-ē, chìn-ji̍p siâ-siâ teh lo̍h ê tōa hō͘. Flossie pūi siaⁿ, chông tī i thâu-chêng. Connie, thâu-chang chiâu tâm, kô͘ tī thâu-khak, oa̍t-kòe sio-sio ê bīn, khòaⁿ tio̍h i. Yi ê nâ-sek ba̍k-chiu chhiong-móa jia̍t-kông, iōng chi̍t-chióng kî-koài ê hiòng-chêng tōng-chok, ná se̍h ná kín cháu, lī-khui khàng-tē, nǹg-ji̍p sió-lō͘, tâm chhiū-ki iân-lō͘ sut tio̍h yi. Yi teh cháu, i kan-ta khòaⁿ tio̍h îⁿ koh tâm ê thâu, hiòng chêng cháu ê tâm kha-chiah-phiaⁿ, kap siám-kng ê kha-chhng-phé: chi̍t-ê teh cháu ê kiu-lun ê cha-bó͘ lō͘-thé.
Yi chha-put-to kàu tōa-lō͘ ê sî, i jek kàu, iōng thǹg-pak-theh ê siang-chhiú lám yi he jiû-nńg, bô chhēng-saⁿ ê io. Yi kiò chi̍t-siaⁿ, sin-thé khiā thêng, kā jiû-nńg, léng-léng ê bah-thé ù tī i ê sin-khu. I hiong-kông kā ân-ân lám tiâu, he jiû-nńg, léng-léng ê bah-thé tú bak-tio̍h tō sûi ná hóe un-loán khí-lâi. Hō͘ lâm in, it-ti̍t kàu in chhèng-ian. I chi̍t-chhiú âⁿ chi̍t-ê yi he khó-ài, hong-boán ê kha-chhng-phé, hiong-kông chhi̍h hiòng ka-tī, tiām-tiām tī hō͘ tiong khū-khū-chùn. Hut-jiân, i kā yi phô͘-koân, hām yi tâng-chê tó tī lō͘, tī siàng tōa-hō͘ ê an-chēng tiong, kín koh kip, i tit-tio̍h yi, kín koh kip tō kiat-sok, ná chhiūⁿ sī chi̍t-chiah iá-siù án-ne.
I sûi koh khiā khí-lâi, kā hō͘-chúi ùi ba̍k-chiu póe-khui.
"Tńg-khì," i kóng, in tō khai-sí cháu tńg khì liâu-á. I cháu ti̍t-ti̍t koh kín: in-ūi i bô ài ak-hō͘. M̄-koh yi bān-bān kiâⁿ, ná bán bo̍k-bōng hoe kap chián-chhiu-lô (剪秋羅, campion) kap nâ-lêng hoe, ná cháu kúi pō͘, ná khòaⁿ i cháu tī yi thâu-chêng khì.
Tán yi chah hoe, chhoán phēⁿ-phēⁿ tńg-lâi kàu liâu-á, i í-keng kā hóe khí-to̍h, chhâ-ki pi-pi pia̍k-pia̍k. Yi ê nn̄g-lia̍p leng khí-lo̍h teh chùn, thâu-chang tâm-kô͘-kô͘, bīn âng-kì-kì, sin-khu siám-kng koh tih chúi. Ba̍k-chiu tōa, khùi chhoán bē-lī, thâu sè koh tâm, thian-chin ê kha-chhng-táu hong-boán koh ná teh tih-chúi, yi tō ná sī pa̍t-khoán seng-bu̍t.
I the̍h kū chhn̂g-toaⁿ kā chhit sin-khu, yi ná chhiūⁿ gín-á khiā leh. Jiân-āu i kā liâu-á mn̂g koaiⁿ hó, koh chhit ka-tī ê sin-khu. Hóe to̍h kah chin tōa. Yi iōng chhn̂g-toaⁿ ê iáu chi̍t-thâu pau tī thâu-khak, chhit yi ê tâm thâu-chang.
"Lán iōng kāng tiâu e̍k-kin chhit sin-khu, án-ne ē oan-ke!" i kóng.
Yi kā khòaⁿ chi̍t-khùn, yi ê thâu-chang loān chhau-chhau.
"Bē!" yi kóng, ba̍k-chiu tián-tōa. "Che m̄-sī e̍k-kin, che sī chhn̂g-toaⁿ." Yi kè-sio̍k bô-êng chhit yi ê thâu, hit-sî i mā teh bô-êng chhit i ê thâu.
Tú-chiah ê chhut-la̍t iáu bōe chhoán soah, in sûi-lâng pau chi̍t-niá kun-thán, lō͘-chhut thâu-chêng ńg hóe, nn̄g-lâng sio-e chē tī hóe chêng ê chhâ-kho͘, chēng-chēng. Connie thó-ià he thán-á tī phôe-hu ê kám-kak. M̄-koh chhn̂g-toaⁿ í-keng lóng tâm-khì ah.
Yi kā thán-á pàng-lo̍h, kūi tī hóe-lô͘ chêng, thâu hiòng hóe, ná hàiⁿ thâu-chang hō͘ ta. I khòaⁿ yi ê kha-chhng-phé sûi-lo̍h ê bí-lē oan sòaⁿ-tiâu. He kin-á-ji̍t hō͘ i chin chùi-sim. Hit-ê siâ-sòaⁿ hiah-nī hong-boán sûi-lo̍h kàu yi îⁿ-kùn-kùn ê kha-chhng-phé! Nn̄g-pêng kha-chhng-phé tiong-kan, chhàng tī pì-bi̍t ê un-loán lāi-bīn, tō-sī sîn-pì ê ji̍p-kháu.
--
15.5 她褪光光, tī 雨 ni̍h 跳舞
外口 ê 雷聲已經停, m̄-koh 本成變細 ê 雨, 雄雄 koh 落大, 綴著最後 ê 爍爁 kap 風雨 ê 聲音. Connie 心神袂定. 伊已經講 chiah 久, 事實上是講予家己聽, 毋是予 Connie. 伊 ná 像完全感覺絕望, m̄-koh 她歡喜, 她討厭絕望. 她知, 是因為她欲離開伊, 伊才會墜落這種心情. 這予她感覺真得意.
她開門, 看外口直直 ê 大雨, ná 像一片鐵幕, 忽然煞想欲走入雨中, 走離開. 她徛起來, kā 長襪仔緊褪掉, koh 褪外衫 kap 內底衫, 伊看 kah 無喘氣. 她 ná 振動, 彼兩粒尖尖 ê 奶綴 teh 搖 koh 顫. Tī 青色光線 ni̍h, 她白 kah ná 象牙. 她 koh lom 好她 ê 樹奶鞋, 發出一陣戇笑 tō 傱出去, ná thèⁿ 她 ê 奶去淋雨, koh 雙手展開, tī 雨 ni̍h 濛濛走跳早前 tī Dresden 所學 ê 韻律舞步. 彼是一个奇怪 ê 濛濛人影夯懸 koh 放低, koh 彎落, 雨 kā 沃, koh tī 她飽滿 ê 尻川斗發光, 她 koh 幌起來, tī 雨 ni̍h kā 腹肚 thèⁿ 前, 她 koh 彎落去, 干焦規个下腰 kap 尻川䫌 ná 像獻禮 án-ne 送到伊 ê 面前, 一擺 koh 一擺, ná 像 teh 拜神.
伊戇笑, kā 衫仔 mā 褪掉. 彼予伊擋袂牢. 伊跳出去, 赤褲膦, 白泡泡, 小顫一下, 進入斜斜 teh 落 ê 大雨. Flossie 吠聲, 傱 tī 伊頭前. Connie, 頭鬃 chiâu 澹, 糊 tī 頭殼, 越過燒燒 ê 面, 看著伊. 她 ê 藍色目睭充滿熱狂, 用一種奇怪 ê 向前動作, ná 踅 ná 緊走, 離開空地, nǹg 入小路, 澹樹枝沿路 sut 著她. 她 teh 走, 伊干焦看著圓 koh 澹 ê 頭, 向前走 ê 澹尻脊骿, kap 閃光 ê 尻川䫌: 一个 teh 走 ê 勼 lun ê 查某露體.
她差不多到大路 ê 時, 伊逐到, 用褪腹裼 ê 雙手攬她彼柔軟, 無穿衫 ê 腰. 她叫一聲, 身體徛騰, kā 柔軟, 冷冷 ê 肉體 ù tī 伊 ê 身軀. 伊兇狂 kā 絚絚攬牢, 彼柔軟, 冷冷 ê 肉體拄沐著 tō 隨 ná 火溫暖起來. 雨淋 in, 一直到 in chhèng 煙. 伊一手 âⁿ 一个她彼可愛, 豐滿 ê 尻川䫌, 兇狂揤向家己, 恬恬 tī 雨中 khū-khū 顫. 忽然, 伊 kā 她 phô͘ 懸, 和她同齊倒 tī 路, tī siàng 大雨 ê 安靜中, 緊 koh 急, 伊得著她, 緊 koh 急 tō 結束, ná 像是一隻野獸 án-ne.
伊隨 koh 徛起來, kā 雨水 ùi 目睭 póe 開.
"轉去," 伊講, in tō 開始走轉去寮仔. 伊走直直 koh 緊: 因為伊無愛沃雨. M̄-koh 她慢慢行, ná 挽莫忘花 kap chián-chhiu-lô (剪秋羅, campion) kap 藍鈴花, ná 走幾步, ná 看伊走 tī 她頭前去.
等她扎花, 喘 phēⁿ-phēⁿ 轉來到寮仔, 伊已經 kā 火起 to̍h, 柴枝 pi-pi pia̍k-pia̍k. 她 ê 兩粒奶起落 teh 顫, 頭鬃澹糊糊, 面紅 kì-kì, 身軀閃光 koh 滴水. 目睭大, 氣喘袂離, 頭細 koh 澹, 天真 ê 尻川斗豐滿 koh ná teh 滴水, 她 tō ná 是別款生物.
伊提舊床單 kā 拭身軀, 她 ná 像囡仔徛 leh. 然後伊 kā 寮仔門關好, koh 拭家己 ê 身軀. 火 to̍h kah 真大. 她用床單 ê 猶一頭包 tī 頭殼, 拭她 ê 澹頭鬃.
"咱用仝條浴巾拭身軀, án-ne 會冤家!" 伊講.
她 kā 看一睏, 她 ê 頭鬃亂操操.
"袂!" 她講, 目睭展大. "這毋是浴巾, 這是床單." 她繼續無閒拭她 ê 頭, 彼時伊 mā teh 無閒拭伊 ê 頭.
拄才 ê 出力猶未喘煞, in 隨人包一領軍毯, 露出頭前 ńg 火, 兩人相挨坐 tī 火前 ê 柴箍, 靜靜. Connie 討厭彼毯仔 tī 皮膚 ê 感覺. M̄-koh 床單已經攏澹去 ah.
她 kā 毯仔放落, 跪 tī 火爐前, 頭向火, ná 幌頭鬃予焦. 伊看她 ê 尻川䫌垂落 ê 美麗彎線條. 彼今仔日予伊真醉心. 彼个斜線 hiah-nī 豐滿垂落到她圓 kùn-kùn ê 尻川䫌! 兩爿尻川䫌中間, 藏 tī 祕密 ê 溫暖內面, tō 是神祕 ê 入口.
--
15.5
The thunder had ceased outside, but the rain which had abated, suddenly came striking down, with a last blench of lightning and mutter of departing storm. Connie was uneasy. He had talked so long now, and he was really talking to himself not to her. Despair seemed to come down on him completely, and she was feeling happy, she hated despair. She knew her leaving him, which he had only just realized inside himself had plunged him back into this mood. And she triumphed a little.
She opened the door and looked at the straight heavy rain, like a steel curtain, and had a sudden desire to rush out into it, to rush away. She got up, and began swiftly pulling off her stockings, then her dress and underclothing, and he held his breath. Her pointed keen animal breasts tipped and stirred as she moved. She was ivory-coloured in the greenish light. She slipped on her rubber shoes again and ran out with a wild little laugh, holding up her breasts to the heavy rain and spreading her arms, and running blurred in the rain with the eurhythmic dance movements she had learned so long ago in Dresden. It was a strange pallid figure lifting and falling, bending so the rain beat and glistened on the full haunches, swaying up again and coming belly-forward through the rain, then stooping again so that only the full loins and buttocks were offered in a kind of homage towards him, repeating a wild obeisance.
He laughed wryly, and threw off his clothes. It was too much. He jumped out, naked and white, with a little shiver, into the hard slanting rain. Flossie sprang before him with a frantic little bark. Connie, her hair all wet and sticking to her head, turned her hot face and saw him. Her blue eyes blazed with excitement as she turned and ran fast, with a strange charging movement, out of the clearing and down the path, the wet boughs whipping her. She ran, and he saw nothing but the round wet head, the wet back leaning forward in flight, the rounded buttocks twinkling: a wonderful cowering female nakedness in flight.
She was nearly at the wide riding when he came up and flung his naked arm round her soft, naked-wet middle. She gave a shriek and straightened herself and the heap of her soft, chill flesh came up against his body. He pressed it all up against him, madly, the heap of soft, chilled female flesh that became quickly warm as flame, in contact. The rain streamed on them till they smoked. He gathered her lovely, heavy posteriors one in each hand and pressed them in towards him in a frenzy, quivering motionless in the rain. Then suddenly he tipped her up and fell with her on the path, in the roaring silence of the rain, and short and sharp, he took her, short and sharp and finished, like an animal.
He got up in an instant, wiping the rain from his eyes.
‘Come in,’ he said, and they started running back to the hut. He ran straight and swift: he didn’t like the rain. But she came slower, gathering forget-me-nots and campion and bluebells, running a few steps and watching him fleeing away from her.
When she came with her flowers, panting to the hut, he had already started a fire, and the twigs were crackling. Her sharp breasts rose and fell, her hair was plastered down with rain, her face was flushed ruddy and her body glistened and trickled. Wide-eyed and breathless, with a small wet head and full, trickling, naïve haunches, she looked another creature.
He took the old sheet and rubbed her down, she standing like a child. Then he rubbed himself having shut the door of the hut. The fire was blazing up. She ducked her head in the other end of the sheet, and rubbed her wet hair.
‘We’re drying ourselves together on the same towel, we shall quarrel!’ he said.
She looked up for a moment, her hair all odds and ends.
‘No!’ she said, her eyes wide. ‘It’s not a towel, it’s a sheet.’ And she went on busily rubbing her head, while he busily rubbed his.
Still panting with their exertions, each wrapped in an army blanket, but the front of the body open to the fire, they sat on a log side by side before the blaze, to get quiet. Connie hated the feel of the blanket against her skin. But now the sheet was all wet.
She dropped her blanket and kneeled on the clay hearth, holding her head to the fire, and shaking her hair to dry it. He watched the beautiful curving drop of her haunches. That fascinated him today. How it sloped with a rich down-slope to the heavy roundness of her buttocks! And in between, folded in the secret warmth, the secret entrances!
--





Wednesday, October 7, 2020

15.4 我欲 kā 機器 ùi 地球掃掉

15.4 Góa boeh kā ki-khì ùi tē-kiû sàu-tiāu
Yi jiû-jiû iōng bīn lù i ê pak-tó͘, chhiú phóng i ê lān-hu̍t-á. Lān-chiáu sió-khóa teh ngiauh, ná ū kî-miāu ê sèⁿ-miā, m̄-koh iáu-bōe khiàu khí-lâi. Gōa-kháu ê hō͘ piàⁿ-sèⁿ-miā teh lo̍h.
"Lán lâi ūi kî-thaⁿ ê mi̍h-kiāⁿ seng-oa̍h. Lán mài ūi tio̍h thàn-chîⁿ seng-oa̍h, mā mài ūi ka-tī a̍h-sī ūi pa̍t-lâng. Taⁿ, lán put-tek-í. Lán put-tek-í tio̍h ūi ka-tī thàn chi̍t-kóa, tōa pō͘-hūn lóng sī thè thâu-ke thàn. Lán tio̍h kái-piàn che! Chi̍t-pō͘ chi̍t-pō͘ kái-piàn. Lán m̄-bián tōa-siaⁿ. Chi̍t-pō͘ chi̍t-pō͘, lán hìⁿ-sak kui-ê kang-gia̍p seng-oa̍h, tò tńg-khì. Chi̍t sut-á chîⁿ tō ū-kàu. Ta̍k-ê lóng kāng-khoán, lí kap góa, thâu-ke kap chú-lâng, sīm-chì kok-ông. Chi̍t sut-á chîⁿ tō ū-kàu. Chí-iàu ū koat-sim, lí tō ē-tàng thiàu chhut khùn-kéng." I sió thêng-khùn, chiah koh kè-sio̍k:
"Góa ē kā in kóng: Khòaⁿ, lí khòaⁿ Joe! I hêng-tōng khó-ài! Khòaⁿ i án-ná hêng-tōng, oa̍h-phoat koh liú-lia̍h. I chiâⁿ súi! Koh khòaⁿ Jonah! I pūn-chhiâng, bái kô͘-kô͘, in-ūi i m̄-bat boeh ka-tī khiā-khí. Góa ē kā in kóng: Khòaⁿ! khòaⁿ lín ka-tī! keng-thâu chi̍t-pêng koân chi̍t-pêng kē, siang-thúi oan-oan, siang-kha pái! Lín ê khó͘-kang ná kā lín hāi kah án-ne? Hō͘ lín ka-tī hāi-liáu-liáu. Bô su-iàu chò hiah chē. Kā saⁿ thǹg tiāu, khòaⁿ lín ka-tī. Lín pún tio̍h oa̍h-phoat koh bí-lē, m̄-koh taⁿ lín bái koh pòaⁿ-sí. Góa ē án-ne kā in kóng. Góa ē kiò cha-po͘ lâng chhēng bô-kāng ê saⁿ: pa̍k-sin ê âng tn̂g-khò͘, hiáⁿ-âng ê siatchuh, pe̍h-sek ê jiaket. Ai-ah, cha-po͘ nā ū âng-sek súi ê siang-thúi, kan-ta he tī chi̍t-kò-goe̍h tō ē kā in kái-piàn. In tō koh khai-sí chiâⁿ-chò cha-po͘ lâng! Cha-bó͘ neh, ē-sái chiàu ka-tī ê kah-ì khì chhēng. In-ūi, cha-po͘ kiâⁿ-lō͘ ê sî kha-thúi nā chhēng pa̍k-sin ê âng tn̂g-khò͘, kha-chhng hó-khòaⁿ, koh tī pe̍h-sek jiaket ē-bīn hiàn-chhut âng-sek: án-ne cha-bó͘ tō khai-sí ū cha-bó͘ lâng khoán. Taⁿ sī in-ūi cha-po͘ m̄-sī cha-po͘, cha-bó͘ chiah ē piàn-sêng án-ne... Jiân-āu, kā Tevershall húi-tiāu, koh khí chi̍t-kóa sin ê súi chhù, hō͘ lán lóng ū thang tòa. Koh kā chng-kha chéng-lí chi̍t-ē. Mài ū siuⁿ chē gín-á, in-ūi sè-kài ê lâng siuⁿ chē ah.
"M̄-koh, góa bē kā cha-po͘ lâng kóng-kàu: kan-ta ē pak-tiāu in ê saⁿ, kóng: Khòaⁿ lín ka-tī! He lóng sī ūi-tio̍h thàn-chîⁿ!... Chim-chiok lín ka-tī! He lóng sī ūi-tio̍h thàn-chîⁿ! Lín it-ti̍t lóng ūi-tio̍h thàn-chîⁿ! Lín khòaⁿ Tevershall! Hia chiâⁿ khióng-pò͘. In-ūi hia hō͘ lín ūi-tio̍h chîⁿ kang-chok. Khòaⁿ lín kau-pôe ê cha-bó͘! Yin bô koan-sim lín, lín mā bô koan-sim yin. In-ūi lín ê sî-kan lóng iōng tī kang-chok, iōng tī koan-sim thàn-chîⁿ. Lín bē-tàng khai-káng, bē-tàng oa̍h-tāng, bē-tàng seng-oa̍h, lín bē-tàng hó-hó hām cha-bó͘ kau-óng. Lín bô teh seng-oa̍h. Khòaⁿ lín ka-tī lah!"
Chi̍t-chūn oân-choân ê tiām-chēng. Connie chi̍t-pòaⁿ teh thiaⁿ, ná kā yi ùi lâi liâu-á ê lō͘-siōng só͘ chhái ê bo̍k-bōng hoe kat tī i pak-tó͘ ē ê mo͘-khiû ni̍h. Gōa-kháu ê sè-kài tiām chiuh-chiuh, sió-khóa ē léng.
"Lí ū sì chióng mo͘," yi kā i kóng. "Lí heng-khám ê mo͘ chha-put-to sī o͘-sek, thâu-mo͘ sek chhián-chhián: m̄-koh lí ê chhùi-chhiu chho͘ koh chhiah, lí chia ê mo͘, ài-chêng ê mo͘, ná chhiūⁿ siám-sih kim-âng ho̍k-kià-seⁿ (槲寄生, mistletoe) ê chhéng-á. Che sī só͘-ū tiong-kan siōng kó͘-chui ê!"
I khòaⁿ lo̍h-khì, khòaⁿ tio̍h tī kái-piⁿ mo͘-khiû ni̍h gû-leng sek ê bo̍k-bōng hoe.
"Ái! Hia sī khǹg bo̍k-bōng hoe ê hó só͘-chāi, m̄-koán cha-po͘ a̍h cha-bó͘ ê mo͘-khiû. M̄-koh, lí kám bô koan-sim bī-lâi?"
Yi áⁿ-thâu khòaⁿ i.
"Oh, góa chiok koan-sim neh!" yi kóng.
"In-ūi tī kám-kak jîn-lūi siū i ka-tī pi-phí ê khok-hêng só͘ chù-tiāⁿ ê sî, góa tō kám-kak Si̍t-bîn-tē pēng bô hiah-nī hn̄g. Goe̍h-niû mā bô hiah-nī hn̄g, in-ūi tī hia lí ē-tàng oa̍t-thâu khòaⁿ chē-chē thiⁿ-chheⁿ tiong-kan ê tē-kiû: a-cha, khok-hêng, bô-bī, che lóng sī jîn-lūi chō-sêng ê. Chū án-ne, góa kám-kak góa ná thun-lo̍h táⁿ-chiap, khó͘ kah boeh péng-pak, nā ū ūi thang cháu-siám, lóng bē siuⁿ hn̄g. M̄-koh, nā oat chi̍t-ê oan, góa tō koh bē-kì-tit. Sui-jiân sī kiàn-siàu-tāi, chit pah-nî lâi, lán lâng siū-tio̍h ê sī siáⁿ-khoán ê tùi-thāi ah: lâng piàn-chiâⁿ kang-chok ê thâng-thōa, sit-khì lâng ê pún-sèng kap lâng ê seng-oa̍h. Góa boeh kā ki-khì ùi tē-kiû piáu-bīn sàu-tiāu, boeh choa̍t-jiân kiat-sok kang-gia̍p sî-tāi, ná kiat-sok chi̍t-ê o͘-àm ê chhò-gō kāng-khoán. M̄-koh, in-ūi góa chò bē-kàu, mā bô lâng chò ē-kàu, góa siōng-hó sī pó-chhî sim-chêng pêng-chēng, kòe ka-tī ê seng-oa̍h: góa sī m̄-sī ū hit-lō seng-oa̍h, che góa mā hoâi-gî."
--
15.4 我欲 kā 機器 ùi 地球掃掉
她柔柔用面 lù 伊 ê 腹肚, 手捧伊 ê 膦核仔. 膦鳥小可 teh ngiauh, ná 有奇妙 ê 性命, m̄-koh 猶未翹起來. 外口 ê 雨拚性命 teh 落.
"咱來為其他 ê 物件生活. 咱莫為著趁錢生活, mā 莫為家己抑是為別人. 今, 咱不得已. 咱不得已著為家己趁一寡, 大部份攏是替頭家趁. 咱著改變這! 一步一步改變. 咱毋免大聲. 一步一步, 咱挕捒規个工業生活, 倒轉去. 一屑仔錢 tō 有夠. 逐个攏仝款, 你 kap 我, 頭家 kap 主人, 甚至國王. 一屑仔錢 tō 有夠. 只要有決心, 你 tō 會當跳出困境." 伊小停睏, 才 koh 繼續:
"我會 kā in 講: 看, 你看 Joe! 伊行動可愛! 看伊 án-ná 行動, 活潑 koh 扭掠. 伊誠媠! Koh 看 Jonah! 伊笨 chhiâng, 䆀糊糊, 因為伊 m̄-bat 欲家己徛起. 我會 kā in 講: 看! 看恁家己! 肩頭一爿懸一爿低, 雙腿彎彎, 雙跤跛! 恁 ê 苦工那 kā 恁害 kah án-ne? 予恁家己害了了. 無需要做 hiah 濟. Kā 衫褪掉, 看恁家己. 恁本著活潑 koh 美麗, m̄-koh 今恁䆀 koh 半死. 我會 án-ne kā in 講. 我會叫查埔人穿無仝 ê 衫: 縛身 ê 紅長褲, 顯紅 ê siatchuh, 白色 ê jiaket. Ai-ah, 查埔若有紅色媠 ê 雙腿, 干焦彼 tī 一個月 tō 會 kā in 改變. In tō koh 開始成做查埔人! 查某 neh, 會使照家己 ê 佮意去穿. 因為, 查埔行路 ê 時跤腿若穿縛身 ê 紅長褲, 尻川好看, koh tī 白色 jiaket 下面現出紅色: án-ne 查某 tō 開始有查某人款. 今是因為查埔毋是查埔, 查某才會變成 án-ne... 然後, kā Tevershall 毀掉, koh 起一寡新 ê 媠厝, 予咱攏有通蹛. Koh kā 庄跤整理一下. 莫有 siuⁿ 濟囡仔, 因為世界 ê 人 siuⁿ 濟 ah.
"M̄-koh, 我袂 kā 查埔人講教: 干焦會剝掉 in ê 衫, 講: 看恁家己! 彼攏是為著趁錢!... 斟酌恁家己! 彼攏是為著趁錢! 恁一直攏為著趁錢! 恁看 Tevershall! 遐誠恐怖. 因為遐予恁為著錢工作. 看恁交陪 ê 查某! 姻無關心恁, 恁 mā 無關心姻. 因為恁 ê 時間攏用 tī 工作, 用 tī 關心趁錢. 恁袂當開講, 袂當活動, 袂當生活, 恁袂當好好和查某交往. 恁無 teh 生活. 看恁家己 lah!"
一陣完全 ê 恬靜. Connie 一半 teh 聽, ná kā 她 ùi 來寮仔 ê 路上所採 ê 莫忘花結 tī 伊腹肚下 ê 毛虯 ni̍h. 外口 ê 世界恬 chiuh-chiuh, 小可會冷.
"你有四種毛," 她 kā 伊講. "你胸坎 ê 毛差不多是烏色, 頭毛色淺淺: m̄-koh 你 ê 喙鬚粗 koh 赤, 你遮 ê 毛, 愛情 ê 毛, ná 像閃爍金紅 ho̍k-kià-seⁿ (槲寄生, mistletoe) ê 筅仔. 這是所有中間上古錐 ê!"
伊看落去, 看著 tī 骱邊毛虯 ni̍h 牛奶色 ê 莫忘花.
"Ái! 遐是囥莫忘花 ê 好所在, 毋管查埔抑查某 ê 毛虯. M̄-koh, 你敢無關心未來?"
她 áⁿ 頭看伊.
"Oh, 我足關心 neh!" 她講.
"因為 tī 感覺人類受伊家己卑鄙 ê 酷刑所註定 ê 時, 我 tō 感覺殖民地並無 hiah-nī 遠. 月娘 mā 無 hiah-nī 遠, 因為 tī 遐你會當越頭看濟濟天星中間 ê 地球: a-cha, 酷刑, 無味, 這攏是人類造成 ê. 自 án-ne, 我感覺我 ná 吞落膽汁, 苦 kah 欲 péng 腹, 若有位通走閃, 攏袂 siuⁿ 遠. M̄-koh, 若斡一个彎, 我 tō koh 袂記得. 雖然是見笑代, 這百年來, 咱人受著 ê 是啥款 ê 對待 ah: 人變成工作 ê 蟲 thōa, 失去人 ê 本性 kap 人 ê 生活. 我欲 kā 機器 ùi 地球表面掃掉, 欲絕然結束工業時代, ná 結束一个烏暗 ê 錯誤仝款. M̄-koh, 因為我做袂到, mā 無人做會到, 我上好是保持心情平靜, 過家己 ê 生活: 我是毋是有 hit-lō 生活, 這我 mā 懷疑."
--
15.4
She softly rubbed her cheek on his belly, and gathered his balls in her hand. The penis stirred softly, with strange life, but did not rise up. The rain beat bruisingly outside.
‘Let’s live for summat else. Let’s not live ter make money, neither for us-selves nor for anybody else. Now we’re forced to. We’re forced to make a bit for us-selves, an’ a fair lot for th’ bosses. Let’s stop it! Bit by bit, let’s stop it. We needn’t rant an’ rave. Bit by bit, let’s drop the whole industrial life an’ go back. The least little bit o’ money’ll do. For everybody, me an’ you, bosses an’ masters, even th’ king. The least little bit o’ money’ll really do. Just make up your mind to it, an’ you’ve got out o’ th’ mess.’ He paused, then went on:
‘An’ I’d tell ’em: Look! Look at Joe! He moves lovely! Look how he moves, alive and aware. He’s beautiful! An’ look at Jonah! He’s clumsy, he’s ugly, because he’s niver willin’ to rouse himself. I’d tell ’em: Look! look at yourselves! one shoulder higher than t’other, legs twisted, feet all lumps! What have yer done ter yerselves, wi’ the blasted work? Spoilt yerselves. No need to work that much. Take yer clothes off an’ look at yourselves. Yer ought ter be alive an’ beautiful, an’ yer ugly an’ half dead. So I’d tell ’em. An’ I’d get my men to wear different clothes: appen close red trousers, bright red, an’ little short white jackets. Why, if men had red, fine legs, that alone would change them in a month. They’d begin to be men again, to be men! An’ the women could dress as they liked. Because if once the men walked with legs close bright scarlet, and buttocks nice and showing scarlet under a little white jacket: then the women ’ud begin to be women. It’s because th’ men aren’t men, that th’ women have to be. — An’ in time pull down Tevershall and build a few beautiful buildings, that would hold us all. An’ clean the country up again. An’ not have many children, because the world is overcrowded.
‘But I wouldn’t preach to the men: only strip ’em an’ say: Look at yourselves! That’s workin’ for money! — Hark at yourselves! That’s working for money. You’ve been working for money! Look at Tevershall! It’s horrible. That’s because it was built while you was working for money. Look at your girls! They don’t care about you, you don’t care about them. It’s because you’ve spent your time working an’ caring for money. You can’t talk nor move nor live, you can’t properly be with a woman. You’re not alive. Look at yourselves!’
There fell a complete silence. Connie was half listening, and threading in the hair at the root of his belly a few forget-me-nots that she had gathered on the way to the hut. Outside, the world had gone still, and a little icy.
‘You’ve got four kinds of hair,’ she said to him. ‘On your chest it’s nearly black, and your hair isn’t dark on your head: but your moustache is hard and dark red, and your hair here, your love-hair, is like a little brush of bright red-gold mistletoe. It’s the loveliest of all!’
He looked down and saw the milky bits of forget-me-nots in the hair on his groin.
‘Ay! That’s where to put forget-me-nots, in the man-hair, or the maiden-hair. But don’t you care about the future?’
She looked up at him.
‘Oh, I do, terribly!’ she said.
‘Because when I feel the human world is doomed, has doomed itself by its own mingy beastliness, then I feel the Colonies aren’t far enough. The moon wouldn’t be far enough, because even there you could look back and see the earth, dirty, beastly, unsavoury among all the stars: made foul by men. Then I feel I’ve swallowed gall, and it’s eating my inside out, and nowhere’s far enough away to get away. But when I get a turn, I forget it all again. Though it’s a shame, what’s been done to people these last hundred years: men turned into nothing but labour-insects, and all their manhood taken away, and all their real life. I’d wipe the machines off the face of the earth again, and end the industrial epoch absolutely, like a black mistake. But since I can’t, an’ nobody can, I’d better hold my peace, an’ try an’ live my own life: if I’ve got one to live, which I rather doubt.’
--